Kielsen: Naatsorsuutigaara naalakkersuisoqatimma inatsisit malissagaat
Kalaallit Nunaanni inuussutissarsiutini suliat annertunersaat , tassalu Kuannersuarni aatsitassanik piaanissamik suliami partiit taamatullu naalakkersuisut iluminni assortuunniarput.
- Isumaqatigiissummi erseqqilluinnartumik allaqqavoq Inuit ataqatigiit aamma Partii Naleraq uranimik attueqqusinngilluinnarnermik politikkeqarnerput attakkipput, Sara Olsvig KNR-imut oqarpoq.
Naalakkersuisoqatigiinnissamik isumaqatigiissut nutaaq SIK-imit isornartorsiorneqangaatsiarpoq.
- Isumaqarpunga paasisariaqaripput maani nunami uranimik ulikkaartumi najugaratta, Jess G. B oqarpoq, Nangillunilu;
- Allanngiivippoq ima iliortoqartoq, uranimik annikinnerpaamik nassaassaagut, nunani allani uranimik annerpaanik ujarlerput, taamaatumik pingaaruteqarpoq aatsitassanik qaqutigoortunik nunarput tamakkerlugu peqarmat Narsaq kisiat pinnagu sineriak tamakkerlugu suliffeqarfiit neqeroorfigineqartariaqarput, oqarfigalugillu ukiuni 20-ni tuliuttuni aatsitassat pillugit imatut ittumik inatsiseqarpugut taamaatumik qaaniaritsi.
Aamma atuaruk Qulaarpaa Uranip Naalakkersuisoqatigiit suleqatigiikkunnaarsissinnaagai
Kim Kielsen mianersortumik silatusaartumillu iliuuseqartoqarnissaq erseqqissaagaa, suliffeqarfik GME Kuannersuarni aatsitassanik piiaanissamik qinnuteqarpat, inatsisitatuuttut malinneqassaasoq
- Uani inatsit tunngavigalugu nalilersuisussaavugut. Naatsorsuutiginngilara naalakkersuisoqatikka inatsisit avaqqutaarlugit aalajangiissasut. Inatsisit tunngavigalugit aalajangiinerit pisartussaapput, Kim Kielsen taama oqarpoq.
Naalakkersuisoqataasut IAp siulittaasua Sara Olsvig aviisimi Weekend-avisenimi apersorneqarluni oqarpoq, - avataangiisinut apeqqutit aama politikikkut aalajangiinerit pissutigalugit, GME itigartinneqarsinnaasoq, aviisi sermitsiaq taama allaaserisaqarpoq.
Aamma atuaruk Qulaarpaa Kuannersuarni suliniutissaq naalakkersuisooqatigiit misilittarneqaatigissagaat
- Tamanna ajortumik kinguneqassaaq eqqarsaatigineqarsinnaanngilarluunniit GME politikkikkut aalajangiinerit tunngavigalugit itigartinneqarpat, aatsitassanut inatsit unioqqutissagaat, Københavnip univisitetani inatsisilermik professori Peter Pagh taama oqarpoq.
Ingerlartsineq inatsisit naapertorlugit suliarineqassaapput, Peter Paghillu oqaaseqarfiginianngilaa, GME-p qinnuteqaataa politikikkut tunngaveqartumik itigartitsissutigineqarpat aatsitassanut inatsit tunngavineqarnani.
- Takorloorsinnaanngilara taama isummakkut piginnaanikitsigisumik iliortoqarsinnaanera. Takorloorsinnaanngilara inatsisit malinniarnagit naalakkersuisut oqassasut, inatsisilerinermik professori Peter Pagh KNR-imut taama oqarpoq.
