PITUFFIK Kielsen eqqartuussissuserisut suliaat pillugu: Aviisimi atuarsinnaavarsi
Inuit Ataqatigiit siulittaasuata Sara Olsvigip, Naalakkersuisut siulittaasuata Kim Kielsenip Inatsisartuni ullaap tungaanut apeqqarissaarfigineqarsinnaanerani assigiinngitsunik apeqquteqaateqarfigaa.
- Inatsisilerituunit misissuisitsineq ammasumik sooruna saqqummiunniarneqanngitsoq? Misissuisitsinerup nassuiaatitai sooruna saqqummiunneqarnianngitsut? Sara Olsvig ilaatigut aperivoq.
Naalakkersuisut siulittaasuata akissuteqaammini ilaatigut oqaatigaa kommissoria, tassa misissuisitsinissap nassuiaatitaa AG-mi ullumi saqqummersumi takuneqarsinnaasoq, namminerlu saqqummiuttariaqannginnerarlugit.
Kim Kielsenip akissuteqaatai Inatsisartuni assigiinngitsunik qisuariarfigineqarput:
- Naalakkersuisuusimasut nutaamik Naalakkersuisunut toqqaasoqarnissaata tungaanut akisussaaffimmik tigumminnipput, tamanna assortuussutigineqarsinnaanngilaq, aammalu kingumut ukiunut tallimanut akisussaatinneqarsinnaapput. Taamaammat akisussaaffimmik inissiinissaq pissanganartorujussuuvoq. Tassa takusussanngorparput eqqunngitsumik oqalunnerit allallu akisussaaffigineqartariaqarput. Aamma Naalakkersuisoqarfimmi pisortat atorfillit namminneerlutik ingerlatsisimagaluarpata Naalakkersuisuat akisussaatinneqartussaavoq, tassa taamaapput inatsisit, Partii Naleqqap siulittaasua Hans Enoksen oqarpoq.
