Katuaq angusarissaarpoq
Katuap 2011-mut ukiumoortumik naatsorsuusiaani takuneqarsinnaavoq 437.000 koruuninik sinneqartoortoq - tassa missingersuutigineqartunit sisamariaatingajammik amerlanerusumik, aamma 2010-mut naleqqiullugu pitsanngoriaateqarnerujussuulluni, 2010-mimi ½ millionit koruuningajannik amigartooruteqarpoq.
- Pingaartumik nipilersornermik aaqqissuussinerit 36-t, isiginnaartitsinerillu 50-ingajalluinnaat, naatsorsuutigisamit ornigarneqarluarsimapput, Katuami pisortaq, Julia Pars, unnersiorpoq.
Nuummiut 51.000-ingajaat Katuamut filmeriaasimanerat aningaasaqarnermut aamma iluaqutaasimaqaaq, filmimmi 107-it 2011-mi takuteqqaarneqarput.
Bilitsit 51.000-it tunineqarsimasut ima aamma naatsorsorneqarsinnaapput - Nuummiut tamarmik - meeraaqqaniit utoqqarsuarnut - siorna ikinnerpaamik pingasoriarlutik filmeriarsimapput.
Katuamit aamma isumaqarput, 3D-mik digitalimik filmertitsisalerneq filmeriartoqarnerulerneranut pissutaasoq.
Nipilersornerup, isiginnaartitsinerup filmertitsinerullu saniasigut, qitinnermik takutitsinerit, eqqumiitsulianik saqqummersitsinerit, oqalugiarnerit ataatsimeersuarnerillu ukiunut arlalinnut siuliinut naleqqiullugit 2011-mi Katuamut aamma iluaqutaasimaqaat.
