Kattusseqatigiit Partiiat Inatsisartunut qinigassanngorteqqissanngilaq
Kattusseqatigiit Partiiat 2013-imi Inatsisartunut qinersinermi, inatsisartunut isertitaqanngitsoorpoq, taamanikkut 326-nit qinerneqarluni, 2009-mi Inatsisartunut qinersinermi 1.084-init qinerneqarluni.
Qinigassanngortitseqqissagunilu Inatsisartunut qinersisarneq pillugu inatsit naapertorlugu qinersisoqartinnagu atsiornerit ikinnerpaamik 1000-ngajaat katersoqqaartariaqassallugit.
- Aamma Inatsisartunut ilaasortaatitaqarunnaarnerup kinguneraa, Kattusseqatigiit Partiiat soorunami politikkikkut sulinermi tapiissutinik pisinnaajunnaarmat. Taamaammallu qinersinissamut aningaasassarsiornissaq piffissangaatsiamik atuiffiusussaassalluni, Anthon Frederiksen, Kattusseqatigiinni siulersuisuusimasut sinnerlugit tusagassiorfinnut nalunaaruteqarluni allappoq, nangipporlu:
- Taamaammat siulersuisuunerni qinersisartut 2013-imi aalajangersimanerat ataqqivarput, politikkikkullu nutaamik suleqatigiinnerunissamik alloriarfiusussamik siunniussaqarpugut. Ilaasortavut, ilaasortaasarsimasut, qinersiserisarsimasavut tamaasa qutsavigaangut, Anthon Frederiksen naggasiivoq.
