Kattusseqatigiit: KNI–ip aqutsilernissaa ernumanartoqarpoq
Nunaqarfinnik pilersuinermi KNI aqutsisunngussaaq, taama Inatsisartuni amerlanerussuteqartut, Siumut, Inuit Ataqatigiit Atassutikkullu isumaqarput. Amerlanerussuteqartunit nunaqarfinni tunisassiornikkut Nuka A/S-p ingerlatsinerata nunaqarfiillu Royal Arctic Bygdeservice aqqutigalugu pilersorneqarnerisa ingerlatsiveqarfimmit ataatsimit tassalu KNI-mit tiguneqarnissaa aalajangiuppaat.
Inatsisartuni amerlanerussuteqartut isumaqarput nunaqarfiit nioqqutissatigut pilersorneqarnerat angallassivigineqarnerallu ataatsimoortinneqalerpata, tassa Kni-mit ataatsimoortillugit ingerlanneqalerpata, tamanna nunaqarfimmiunut akikinnerungaalissasoq.
Inuit Ataqatigiinnit Kuppik Kleistip tikkuarpaa nunaqarfiit pilersorneqarnerata KNI-mit ingerlanneqalerpat nunaqarfinni tunisassiat sinerissamut sukkanersumik apuunneqarsinnaalissasut.
Amerlanerussuteqartulli taamatut ingerlatsilernissap pitsaaqutaanik arlalissuarnik tikkuartuigaluartut Inatsisartuni ilaannit taamatut aaqqiiniarneq ernumanartoqartinneqarpoq. Ilatigut nunaqarfinnik pilersuineq umiarsuaatileqatigiinnit allanit tiguneqarpat maanna pilersuinermi sulisorineqartut 40-nit amerlanerusut suliffissaarussinnaanerat ernummatigineqarpoq.
Nunaqarfinnik imaatigut pilersuineq KNI-ip 2006-mi tigusussaavaa, tassanilu pilersuinerup norsket umiarsuaatileqatigiiffiannit ingerlanneqarnissaa KNI-mit pilersaarutigineqarpoq. Oqaatigineqarporlu Norgemiut umiarsuaatileqatigiiffiata kalaallinik sulisoqarnissi ammaffigingaa oqaatigineqarpoq. Atorfinitsitsinissamulli immikkut pisussaaffilerneqanngitsoq aamma erseqqissaatigineqarluni. Tamanna pillugu Kattusseqatigiit sinnerlugit Inatsisartuni ilaasortaq Villy Olsvig ernumasunut ilaavoq:
-Isornartut ukuusinnaapput umiartortut nunaqavissut RAB-imi sulisuusut, Green Reefers-i kiffartuussilissangaluarpat, kiffartuussilernissaalumi amerlanerussuteqartunit akuerineqarpoq. Taamaattorli umiartortut atorfinissinnaanerat maannamut periarfissaqanngitsutut isikkoqarpoq.
Nunaqarfiit pilersorneqarnerat KNI-mit ingerlanneqalerpat ernumassutissaqanngilaq, sulisoqarnikkut pilersorneqarnikkulluunniit, Naalakkersuisut siulittaasuat Hans Enoksen oqarpoq.
- Uani ernumanissamut pissutissangilaq, naalakkersuisut siunertarinngilluinnaqqissaarpaat nunaqarfimmiunik kiffartuussinerup ajorseriarnissaa. Akerlianilli pitsanngoriaateqartitsinissaq, sukkanerusumik kiffartuussinissaq siunerfiupput. Taamaalilluni nunaqarfimmiut ukiorpassuarni kissaataat anglerparput, qujanartumik. Umiartortullu ernumasaarneqarlutik massakkut oqaluffigineqaqattarnerat iluarivallaanngilara, umiartortummi suliffissaariutsinneqarnissaat siunertarineqanngilluinnarmat, Hans Enoksen oqarpoq.
