Suliaq Atammimmut tunngasoq Katsorsarneqalersut qutsannarput usornarlutillu
32-nik ukiulik Avgo Poulsen maanna Nuummi najugaqarnini pissutigalugu nunaqqatini maanna katsorsarneqalersut peqataaffigisinnaanngilai.
- Soorunami qutsannarput, usornarlutillu, ataatsimoorlutik periarfissinneqalermata, soorunalimi uanga misigissutsinnut aalassatitsilaarput, katsorsarneqarneranni peqataarusunnaraluarpoq, Avgo Poulsen taama oqarpoq.
Namminersorlutik Oqartussat tarnip pissusiinik ilisimasallit marluk juunip qaammataani Atammiliartippai, nunaqarfimmilu 200-nik innutaqartumi kinguaassiutitigut atornerlunneqarsimasut ilimagisamit amerlanerusut katsorsaasoqarnissaalu pisariaqarluinnartuusoq paasineqarpoq.
AAMMA ATUARUK Amerlanerusut McGregorip atornerluisimaneranik oqaluttuartut
Qeqqata Kommunia aamma Namminersorlutik Oqartussat suleqatigiillutik Atammimmi meeqqat inuusuttullu ukiut 30-t ingerlaneranni kinguaassiutitigut atornerlunneqarsimasut oqaloqatigisarlugit aallartippaat.
Angalaqatigiit nunaqarfimmut tikeraarnerminni atornerlunneqarsimasut 21-it oqaloqatigineqarlutik katsorneqarnissaminnik pisariaqartitsisut paasineqarpoq.
AAMMA ATUARUK McGregor suli kingunerlutsitsisoq
Avgo Poulsen qulinik ukioqarluni nerrivimmi arsaarartalerpoq Vic Mcgregor sungiusaasoralugu, taassumalu nukappiaraq qulinik ukiulik ukiup ataatsip missaani kinguaassiuutitigit atornerluttarpaa.
Avgo Poulsen nerrivimmi arsaararluni Nunatsinni pissartanngorniunnerni sisamani peqataareerluni
nerrivimmi arsaararneq soqutigiunnaarpaa.
AAMMA ATUARUK Ilaqutariinnermut ataatsimiititaliaq Atammimmeeqqammivoq
Avgo apersortinnermi kingorna atornerlugaanermit kingunerluutit atugarilerpai.
- Angajoqqaanut imaluunnit inersimasunut allanut malugeqquneq, kamattarneq aamma qatanngutinut, imaluunniit tillinniartarnerit atugaalerput, avataanit malugeqqunneq tassuuna takkunnikuuvoq, Avgo Poulsen oqarpoq.
Malugeqqulluni pissusilersornera paasineqanngilaq.
Avgo Poulsen maanna 32-nik ukioqartoq nunaqarfigisamini Atammimmi marloriarluni imminut toqoriaraluarpoq.
- Marloriarlunga imminut nivinngarnikuuvunga, malugeqqusaarluni iliuuserinikuusat tusaaneqannginnerlu sakkortunerisa kingorna, qujanartumilli imminut toqoriaraluarnikka iluatsinngillat, Avgo Poulsen taama oqarpoq.
Inersimasunngornermi kingorna kamassaqartuarnini pillugu tarnip pissusiinik ilisimasalimmik oqaloqateqarnissani pisariaqartillugu oqaloqateqartarpoq.
- Kingunerlutsitsineq qaqugukkulluunniit takkuttuaannarpoq, suliarinngikkaanilu oqimaalliartortarpoq, taamaattumik oqaloqateqarnissannik pisariaqartitsiuaannarpunga - soorunami, Avgo Poulsen taama oqarpoq.
AAMMA ATUARUK Kinguaassiuutitigut atornerluisoqarsimanera nunaqarfimmi suli kingunerlutsitsisoq