Kapisilittassat ikinnerusut
Naalakkersuisut aalajangerput kapisilinniarneq ukioq manna aggustip ulluisa 15-anni aallartissasoq oktoberillu 31-ani unissalluni.
Ukioq manna 32 tonsit pisassiissutigineqarput. Ukiup siulianut sanilliullugit 13 tonsinik ikinnerupput. Tamannalu 2015-imi 13 tonsinik sippuisimanermik pissuteqartoq, Namminersorlutik Oqartussat tusagassiutinut nalunaaruteqarput.
Kalaallit Nunaata kapisilinnillu illersuiniaqatigiiffiup NASCO-p 2015-miit 2017-mut atuuttumik kapisilittassat 45 tonsiusassasut isumaqatigiissutinikuuaat.
Kapisillit pisassiissutigineqartut 32 tonsit oktoberip 31-at sioqqullugu aalisarneqassagaluarpata aalisarneq piaartumik unitsinneqassasoq nalunaarutigineqarpoq.
Inuussutissarsiutigalugu aalisartut kapisilinniarniarunik akuersissuteqassapput. Pisat tunitsivinnut tuneqqusaanngillat taamaattorli kalaalimineerniarfinni tuniniarneqarsinnaallutik, kiisalu neriniartarfinnut, akunnittarfinnut suliffeqarfinnulluunniit tunineqarsinnaallutik.
Sunngiffimmi aalisartut taamaallaat namminneq atugassaminnik kapisilinniarsinnaapput. Inussutissarsiutigalugu sunngiffimmilu aalisartut tamarmik pisaminnik nalunaarsuisassapput.
Pisanik nalunaarfissaq nittartakkami businessingreenland.gl-imi Sinerissap qanittuani aalisarnermut akuersissutit ataani aaneqarsinnaavoq.
Nalunaarsuiffissaq Grønlands Fiskeri Licens kontrol-imut, GFLK-mut, 345000-mut sianerluni imaluunnniit e-mailikkut gflk@nanoq.gl-imut allalluni pissarsiarineqarsinnaavoq.
Inuussutissarsiutigalugu aalisartut tunisinerit tamaasa pisatik nalunaarutigisassavaat sunngiffimmilu aalisartut qassusiarnerit tamaasa nalunaarsuisassallutik.
