KANUKOKA-p Malik Berthelsen taperserpaa

Meeqqanut akilersuutinut akiitsut kommuninut artukkiisarmata aamma KANUKOKA-mit isornartorsiorneqarpoq. Kommuninimi aningaasat allanut atorneqarsinnaagaluartut Qeqqata Kommunia aamma kommunit kattuffiat naliliipput.
septembarip 19-at 2017 08:51

Meeqqanut akilersuutinut akiitsut amerliartuinnarnerat Qeqqata Kommuniani politikerit ernumanartoqartippaat.

- Kommunalbestyrelsemi tamattaalluta isumaqatigiippugut taanna peqqussut qanoq iliuuseqarfigineqanngippat inatsisiliortuninngaanniit kommunimut akiitsut qaffakkaluttuinnaavissasut. Tamannalu ernumanartuuvoq, Qeqqata Kommuniani borgmesteri Malik Berthelsen taama oqarpoq.

Inatsisartut peqqussutaanni pineqartumi meeqqanut akilersuutit aamma meeravissiartaarnermi tapiissutit pillugit meeqqamut akilersuisussaatitaasoq akiliisimanngippat kommune akiliussigallarnissaminut pisussaatitaavoq. Taannali massakkut Qeqqata Kommuniani aningaasarpassuarnik atuiffiuvoq.

- 59 mio.-nit aningaasarpapilussuupput. Assersuutigalugu meeqqeriviit nutaanngilisut imaluunniit meeqqeriviliornernut nutaanut atorneqarsinnaagaluarput, imaluunniit inissialiornernut aamma meeqqanut inuusuttunullu suliniutinut arlaannut atorsinnaagaluarpagut, Malik Berthelsen oqarpoq.

AAMMA ATUARUK Inatsisartut iliuuseqartariaqarput

Ajornartorsiut KANUKOKA-p ilisaraa

Meeqqanullu akilersuutit pillugit kommunenut artuukkiisarnera KANUKOKA-mi ilisarineqarpoq.

Qeqqata Kommunianilu borgemsterip iliuuseqaqqusinera taperserneqarpoq.

- Pissusissamisoortutut taanna isigilluinnaqqisaarparput. Aamma ukua politikkikkut oqallittartoqatigiinnik taasagaat, tassalu borgmesterit tamarmik, KANUKOKA-p siulittaasua, kiisalu naalakkersuisut tamarmik ukiumut marloriarlutik ataatsimittartut, ataatsimiittarnerini tamanna aamma saqqummiunneqartuartarpoq, KANUKOKA-mi siulittaasoq Simon Simonsen taama oqarpoq.

Meeqqanut akilersuutinut akiitsut kommunip aningaasaqarneranut artukkiiginnartartoq aamma erseqqissarneqarpoq.

- Kommunit aningaasassaaleqereeqisut qaavatigut taamatut nammatassinneqarnerat isumaga malillugu peertariaqaavissorivara, taamaammat aamma naalakkersuisut akiitsunit tigusisariaqarnerat pissusissamisoortutut isigivara, Simon Simonsen oqarpoq.

Taamaattumillu inatsisartut peqqussutaata iliuuseqarfiginissaa piffissanngorsorineqarpoq.

- Inatsisiliortunut kissaaatigivarput taassuma peqqussutip taamatut suliarineqarsimanera atorunnaarsinneqassasoq imaluunniit inatsisiliortut kissaatigigunikku peqqussut taanna atuinnarneqassasoq, taava taakku akilersuutit akilerallarneqartartut nunatta karsiata nammineq nammattariaqartarpai, Qeqqata Kommuniani borgmester Malik Berthelsen taama oqarpoq.