KANUKOKA-p inissimaffissaa suli aalajangerneqanngilaq
KANUKOKA-p allaffeqarfia pingasunngorlugu aggulunneqarnani ullumikkutut isikkoqarluni ingerlaannarnissaa, KANUKOKA-mi aallartitat Ilulissani immikkut ittumik ippassaq ataatsimiinneranni aalajangerneqarpoq.
Palle Jeremiassen, Siumumeersoq, kattuffimmi siulittaasutut ingerlaqqippoq, malittarissassallu nutaat, kommuninut pingasunut naleqqussakkat aamma akuersissutigineqarlutik:
- Massakkut ingerlariaqqinnissatsinnut sammivilerneqarpugut, taamaalilluta politikkikkut aaqqissuussaanerput inissinneqarpoq, aamma allaffissornikkut aaqqissuussaanitsinni siunnerfissarput aaqqinneqarpoq, taamaalilluni malittarisassat aamma tulluussarneqarlutik. Tassa sulinissatsinnut sakkussaqalerpugut, Palle Jeremiassen, Siumumeersoq, KANUKOKA-mi siulittaasutut qinigaaqqittoq, taama oqarpoq.
Aamma atuaruk KANUKOKA-p allaffeqarfia aggulunneqassanngilaq
KANUKOKA-p ullumikkutut isikkoqarluni qitiusumik allaffeqaannarnissaa, pingasunullu tassa aggulunneqarani, taassuma orniginartinneruaa, kattuffiup nukittuutut inissimanissaa taamaalilluni qulakkeerneqarniassammat, Palle Jeremiassen oqarpoq.
Kattuffiulli allaffeqarfiata siunissami inissisimaffissaa suli aalajangerneqanngilaq, Kommuneqarfik Sermersuummi kattuffimmi ilaasortaajunnaarnera eqqarsaatigalugu kattuffiup allaffeqarfia kommunimut allamut nuuttussanngorpoq, siulersuisullu tamanna maanna aalajangaaffigisussanngorpaat:
- Suliavut ingerlaannarnikuupput, aamma suliavut politikkikkut tunngasut uninnikuunngillat, taakku ingerlateqqissavavut. Kisianni uani suliakkiissutit pingaarutillit ilagivaat allaffeqarfitta Nuup avataanut nuunneqarnissaa, taanna aamma ukiup affaata tulliuttup ingerlanerani nukinnik annertuumik atuiffiusussaassaaq, Palle Jeremiassen oqarpoq.
Aamma atuaruk Ole Dorph KANUKOKA-p ataatsimiinneranni isumaqatigiissinnaassasut qularinngilaa
KANUKOKA-p qitiusumik allaffeqarfiata illoqarfimmut sorlermut nunneqarnissaa takorloorsinnaaneraa Palle Jeremiassen aperaarput, imalu akivoq:
- Aalajangerqartutuut siulersuisut marsip aallaqqaataa tikitsinnagu tamanna aalajangiiffigissavaat, KANUKOKA-mi siulittaasutut qinigaaqqittoq Palle Jeremiassen, Siumumeersoq, taama oqarpoq.
