Kanngunarsaasoqarneranik suliaq unnerluussisussaatitaasut nalilersoraat
Qaammatip siuliani niviarsiaraq Nuummi atuarfiit ilaanni atuartoq soraarummeertunit kanngutsaatsuliorfigineqarnerata kingorna Kalaallit Nunaanni Politiit misissuinerat naammassimmat unnerluussisussaatitaasuisa pisoq unnerluussummik ingerlateqqinneqassanersoq maanna nalilersorpaat.
Allattoq Mads Pedersen
juunip 15-at 2017 10:41
Niviarsiaraq meeqqat aturfiani soraarummeertuni qilersorneqarluni aalajangersorneqareerluni qarlii kivilerneqarpoq assilisaqattaarneqarlunilu. Tamanna Nuummi meeqqat atuarfiisa ilaanni pivoq.
Kingorna niviarsiaqqamut ataataasup kamassimaqisup pisoq politiinut unnerluutigaa.
Maanna politiini unnerluussisussaatitaasut suliaq unnerluussutitut suliassanngortissanerlugu inatsisitigut nalilersuleruttorpaat. Unnerluussisussaatitaasut KNR-imut taama ilisimatitsipput.
- Politiit misissuinerat naammassereerpoq, maannalu inuk ataaseq arlallilluunniit unnerluunneqarsinnaanersut unnerluussisussaatitaasut nalilersuleruttorpaat, unnerluussisussaatiaasoq Tobias Berg KNR-imut oqarpoq.
