KANGILINNGUIT Kangilinnguani suliarinnittussarsiornerup allanngortinnissaa Aajap piumasaraa

Kangilinnguani sakkutooqarfiusimasumut sullissisussarsiorneq unitsikkallarneqartariaqarpoq, avatangiisinillu saliinermi illuutit ilaat uninngatiinnarneqarlutik.
Assi © : Inspektionskutteren Tulugaq
novembarip 27-at 2015 16:20
Nutserisoq Erna Lynge

Folketingimut ilaasortaq Aaja Chemnitz Larsen taama isumaqarpoq, oqarlunilu Naalakkersuisut Kangilinnguit pillugit kissaatigisatik erseqqissumik oqaatigalugu.

Kangilinnguani avatangiisinik saliineq aasaru aallartinneqarpat illuutit tamarmik ingutserneqassapput. Inuit Ataqatigiilli folketingimut ilaasortaatitaat aalajangiisinnaangaluarpat Illersornissaqarfiup suliarinnittussarsiuussinini allanngortittariaqarpaa.

Aamma atuaruk Kangilinnguani illuutit mingutsitsineq pissutigalugu isaterneqartariaqartut

Aamma illuutit 10 procentiinnaalluunniit mingutsinneqarsimasutut nalilerneqarsimagaluarpata.

- Isumaqarpunga suliassat immikkoortinnissaat pingaartuusoq avatangiisinillu saliisoqarluni, sivisuumimmi pilersaarusiorneqarsimavoq. Ilutigitilluguli misissorlugu illuuterpassuit arlaannut atorneqarsinnaannginnersut, eqqarsaatigeqqinnissaat imminut akilersinnaavoq.

Chemnitz Larsen taama oqaaseqarpoq Kangilinnguani Illersornissaqarfiup illuterpassui napatiinnarneqartariaqartut allat aamma oqaaseqartareersullu -  takornariaqarnermut, ilisimatusarnermut naatitsivittulluunniit atorneqassappat qanoq aningaasalerneqarnissaa tamarmik eqqaasimanngilaat.

Siunnersuutigineqartut tamakku Namminersorlutik Oqartussat kingusinnaannginnerminni misissoqqissaartariaqaraat Aaja Chemnitz Larsen isumaqarpoq.

- Assorsuaq amingaataavoq Namminersorlutik Oqartussat Kangilinnguit pillugit qanoq eqqarsaasersornerlutik qisuariaateqarnissaat. Namminersorlutik Oqartussat soqutiginnittunut pilersaaruteqarnerlutik? Allanilluunniit Kangilinnguanik soqutiginnissinnaasunik ujartuillutik, Aaja Chemnitz Larsen oqarpoq.

Aamma atuaruk Schweizimiut Kangilinnguani nunalerinermik ilinniarfimmik suli pilersitserusuttut

Illersornissaqarfiup siusinnerusukkut sakkutooqarfiusimasumut pisisussarsiorsimagaluarpoq. Pisisup avatangiisinik saliinissaq illuutillu tamaasa tigusussaagaluarpai, soqutiginnittoqarsimanngilarli.

Illersornissaqarfiup pilersaarutini allanngortikkusunngilai.

Pinngortitamut, avatangiisinut Inatsisinillu atuutsitsinermut naalakkersuisoqarfiulli Illersornissaqarfik saliinissaq pillugu ataatsimeeqatigeqqarmerpaa.

Folketingip Illersornissamut ataatsimiititaliaata decembarip arfineq aappaanni ataatsimiinnermini suliaq eqqartussavaa.

Aamma atuaruk ASSIT Sakkutooqarfiusimasoq Kangilinnguit ullumikkut ima isikkoqarpoq