Kangerlussuup eqqaani tatsit tomaatii toqunartut nassaarineqarsimapput

Dartmouth Collegemi, USA-mi Hanoverimiittumi, ilisimatusartut Kangerlussuup eqqaani tatsit 19-it misissugaanni tamarmik tatsit tomaatiinik taasaannik nassaarfiupput.

Tatsit tomaatii tingummik sequtserisartumik mikrocystinimik toqunartuliortarput.

Tatsit tomaatii cyanobakteriaapput ammalortut, iipilitut angitigisut.

Ingeniøren naapertorlugu ilisimatusartut tatsit tomaatiinik amerlasuunik nassaarput, tatsip ilaanni naqqa tamarmi tatsit tomaateqalersimasarluni.

Toqunartoq ima annertutigaaq tatsip imaata akuinik misissuinerni uuttortarneqarsinnaalluni, ilisimatusartulli naapertorlugit peqqissutsimut ulorianarnissaanut annikippallaartumik.

Mikrocystinip inuit uumasullu tinguinik sequtserisinnaavoq, tatsinili uuttortarneqartut annikipput taamaattumillu imeq imeraanni napparsimalissutaasinnaanatik, piffissamili sivisuumi imeraanni toqunartoq timimi katersuulluni ulorianarsisinnaasoq, ilisimatusartoq Jessica Trout-Haney allappoq.

Taamannak nassaartoqarnera ilisimatusartunik tupaallatsitsivoq, cyanobakteriammi immami kissartumiittaraluarput.