Kangerlussuarmi akunnittarfik aningaasakilliorunnaartoq
Kangerlussuup akunnittarfiisa paarlersuani ulluni makkunani qungujulasoqarsinnaallunilu nuannaartoqarsinnaavoq, naatsorsuutimmi ukiuni arlaqartuni sinneqartooruteqarsimanngitsoq maanna sinneqartooruteqartut takuneqarsinnaapput.
Akunnittarfimi aqutsisut aningaasaqarnermik niuerniarnermillu ukkatarisaqarluarnerannik, aammali takornariat amerlanerunerat, ataatsimiinnernut ataatsimeersuarnernullu atortorissaarutinut aningaasaliinerit Kangerlussuarmi akunnittarfimmi sinneqartooruteqarnermut peqqutaasut, akunnittarfimmi piginnittoq, Mittarfeqarfiit tusagassiutinut allappoq. Akunnittarfiup pisortaata, Morten NIelsenip amigartoornermit sinneqartooruteqalerneq qanoq pisimanersoq uani oqaluttuaraa:
- Pisiortorfitsinnut isumaqatigiissutit nalilersoqqippagut, akit, quersuarmilu suut pisiassaatiginerigut suullu piniartarnerigut isiginiarsimavarput. Tassani qaqorsaatiniit oqorutinut tunngapput. Aamma nioqqutissanik eqqortunik neqerooruteqarnikkut aningaasanik iluanaaruteqarniarnissaq sammivarput, Morten Nielsen oqarpoq.
AAMMA ATUARUK Silap pissusiata allanngoriartornera takornariaqarnermut iluaqutaasinnaasoq
Suliniut taanna ukiup 2017-ip affaani millionit affanik amigartooruteqaqqaartitsivoq. Pisortap Morten Nielsenip 2014-imi atorfineqqaarneranut tamanna sanilliukkaanni akunnittarfik 7.6 millionit koruuninik amigartooruteqarpoq. Tamatuma kingornatigulli akunnittarfiup amigartooruteqarfiunini illuanut saatsinnialerpaa. Tamannalu maanna iluatsissimarpasilerpoq:
- Aasaq manna tikeraartorpassuupput, aaqqissuusseqqinnerpullu siulersuisugissaarnitsinni sulisuttalu eqeersimaarluarneratigut iluatsilluarpoq. Neriniartarfimmillu nutaamik sanaqqinnermut aamma aningaasaliissuteqarpugut, atuisartutsinnullu sullissinitta pitsanngorsarnera iluatsilluarsoraara. Aasaq tikeraartorisarpassuagut maanna ataatsimeersuartussanik taarserneqarput, Morten Nielsen oqarpoq.
Akunnittarfiup piginnittuata Mittarfeqarfiit angusat nuannaarutigaat.
AAMMA ATUARUK Der kommer flere turister til Grønland end nogensinde før
