Kangerlussuaq biilinik misileraavittut atoqqinneqalersoq
Kangerlussuarmi biilinik misileraavissamik pilersitsinissaq pillugu Arjeplog Test Management siorna isumaqatigiissuteqarfigineqarpoq. Isumaqatigiissullu taanna inuussutissarsiornermut, suliffeqarnermut, niuernermut nunanullu allanut naalakkersuisup Qeqqata kommuniani borgmesteri peqatigalugu marlunngormat pingasunngormallu isumannaarneqarpoq.
- Nuannaarutigaara ukiorpassuarni uninngasimalluni biilinik misileraasarnermik suliaqartut Kangerlussuarmut soqutiginninnerisa pilerseqqinneqarnerat iluatsinneqarmat, biilinik issilluinnartumik atugaqarlutik misilittaavissaqqilluinnartutut.
Aamma atuaruk Kangerlussuarmi biilinik kingumut misileraavissuaqalissaaq
- Tikeraareernerup kingorna paasinarsivoq, svenskit tungaannit amerlasuunik aningaasaliisoqarsinnaanera kommunimilu suliffissanik nutaarpassuarnik pilersitsisoqarsinnaanera, Vittus Qujaukitsoq oqarpoq.
Sverigemi illoqarfimmi Kirunami Volvo misilerarneqartoq uani takuneqarsinnaavoq.
Namminersorlutik Oqartussat kommuni suleqatigalugu, sinaakkutissatut piumasaqaatit qaammatini aggersuni naammassineqarnissaat qulaakkerniarpaat. Ilaatigut unnuisarnikkut periarfissanik nutarterinissaq eqqarsaatigalugu aamma sumiiffimmi aqqusinertigut suli annertusaanissaq tamatumani pineqarput.
Vittus Qujaukitsup, Hermann Berthelsenip angalaqataasalu biilinik misileraanermik suliffeqarfik Tjintokk, Kangerlussuup eqqaani sermersuarmi 1999-imit 2004-mut VW-p biiliinik nutaanik misileraanermik suliaqartoq, aammalu Arjeplog Test Management Kangerlussuarmi siorna oktobarip qaammataani misileraaviugallartumi biilinik misileraasoq pulaarpaat.
