Kangaatsiap imermik pilersornerunissaa pilersaarutigineqanngitsoq
Kangaatsiami innuttaasunut ataatsimut isigalugu ajornartorsiutinngorsinnaanera aarleqqutigineqarpoq, soorlu aamma aalisartunut tunisassiorfimmullu ajornartorsiortitsilersinnaasoq aalisartut piniartullu aarleqqutigigaat.
AAMMA ATUARUK KAPP: Kangaatsiami imeerunnissaq ernumanarpoq
Siumut sinnerlugu Inatsisartuni ilaasortap Nikolaj Jeremiassenip Kangaatsiami imeqarniarnermut pissutsit pillugit Pinngortitamut Avatangiisinullu Naalakkersuisumut Mala Høy Kúkomut apeqquteqateqarfigaa, naalakkersuisorlu akissuteqaqqammerpoq:
- Nukissiorfiit paasisimavaat taserni imeqarfiusunit erngup annertussusaa, Kangaatsiami pilersuinermut atorneqartoq nungungajassimalluni annikitsuusoq. Tamatumunnga pissutaavoq piffissami aalajangersimasumi sumiiffimmi killeqartuinnarmik siallertarsimanera, kiisalu Royal Greenlandip ilimasaarinertaqanngitsumik Kangaatsimami aalisakkerivimmi imermik atuinermik annertusitsisimanera, Mala Høy Kùko, Nikolaj Jeremiassenimut ilaatigut taama akissuteqarpoq, Royal Greenlandillu imermik atuinerata killeqarnera aamma erseqqissaatigalugu.