Nakkutilliineq Kangaatsiami sulilluartoqarnera qiimmaallannarpoq
Kommunimi ilaqutariinnut meeqqanulluunniit tunngasunut sulianik aallartitsisoqartillugu iliuusissanik pilersaarusiortarneq Kangaatsiami suliani iluatsilluartartut ilagigaat Johan Lund Olsen oqarpoq.
- Kangaatsiami inunnik isuginnittoqarfimmi suliassaqarfimmi sulisut suliassatik pimooruppaat ilisimaarilluarlugillu.
Suliassat ilisimaarilluarpaat
- Inatsisit malillugit pitsaasumik sullissisut malugivagut. Taannalu qiimmallannartorujussuummat tulluusimaarutigisariaqarparput, Johan Lund Olsen oqarpoq
Kangaatsiamili sullissilluartoqaraluartoq suli ikiortarialinnik meeraqarpoq.
Nunali tamakkerlugu tamanna ajornartorsiutaammat Kangaatsiami sullissisut sulilluarnerat nersualaartariaqarpoq.
- Kommunini nunaqarfinnilu nakkutilliiartorluta angalaaraangatta malugisartagarput tassaavoq piitsuussuseq ajornartorsiutitut nalinginnaasorujussuusoq. Ajoraluartumillu ikiaroornartumik hashimillu atornerluineq tuniniaanerlu takusarpagut, Johan Lund Olsen oqarpoq.
Taamaakkaluartoq ajornartorsiutaasut isumaginninnermut immikkoortortaqarfinni sulisunit torersumik suliarineqartarnerat isiginiarneqartariaqartoq aamma oqaatigaa.
Pilersaarut ingerlanneqarpoq
Qaasuitsup Kommuniata ukiunut pingasunut pilersaarut siorna aallartippaat. Pilersaarummi isumaginninnermi immikkoortortaqarfimmi sulisut, nunaqarfinni illoqarfinnilu sullissinermut paasisimasaqarnerulernissaat pikkorissaasarnikkut aallunneqarluni.
Tassa Kangaatsiami Qasigiannguanilu sullissinerit nakkutigineqarluarnerat ajunngilluinnartoq isumaginninnermi immikkoortortaqarfimmi pisortaq Henrik Soloy oqarpoq.
- Tupinnaannarlunilu nuannerpoq. Immikkoortortaqarfinni sulisut suliaminnik namminneq kivitsisinnaanerat erserpoq. Isumaginninnermi siunnersortitut ilinniagaqarnissaq pisariaqanngilaq, nunaqarfinnulli attuumassuteqarluartuunissaq, Henrik Soloy oqarpoq.