Kangaamiuni aalisartut tunisisinnaanngitsut
Royal Arctic Linep angallataa Angaju Ittuk sisamanngormat tikippoq tunisinerlu tallimanngormat unitsinneqarpoq. RAL-ip angallataa aalisakkanik assartuisussaq ullut 14-it qaangiuppata aatsaat tikissaaq, tamannalu Kangaamiuni aalisartunit naammagineqanngilaq.
- Royal Arctic Line-p angallataa akuttuallaartumik Kangaamiunut tikittarpoq aalisakkallu qerisut assartortarlugit, angallatillu usigisinnaasai annertunngimmata, Kangaamiuni tunitsiviup qerititsivia ulikkaartuaannarpoq, Kangaamiuni aalisartut piniartullu peqatigiffianni KAPP-imi siulitaasoq Jens Meeraq Lyberth taama oqarpoq.
Kangaamiuni aalisakkanut tunitsivimmut tunisisinnaannginneq, aalisartunut aamma aalisakkannik tunitsivimmi sulisunut 80-it missaannik amerlassuseqartunut eqquivoq.
Royal Greenlandi aaqqiissuteqaqqugaat
Kangaamiuni aalisakkanik tunisisinaannginnermut aaqqissutissamik nassaarniartoqaqqullugu Kangaamiuni aalisartut piniartullu peqatigiiffiat Royal Greenlandimut saaffiginnissuteqarpoq, 22 juli tungaanut tunisisinnaannginneq akuerineqarsinnaanngimmat.
KAPP isumaqarpoq Kangaamiuni aalisakkanik tunitsiveqarnermut ajornartorsiut aaqqiivineqarnianngippat naalakkersuinikkut akuliuttoqartariaqartoq.
- Royal Greenlandip tunitsivik pillugu sullissinnera aamma Royal Arctic Linep assartuinikkut aaqqiissutissamik saqqummiussinngippata naalakkersuinikkut akuliuttoqartariaqarpoq, pissutsit ajornerannik paasinnissinnaagunik, Kangaamiuni Aalisartut Piniartullu peqatigiiffianni siulittaasoq Jens Meeraq Lyberth taama oqarpoq.
Suliffeqarfissuup Royal Greenlandip nalunaarutigaa, Kangaamiuni Aalisartut Piniartullu Peqatigiffiannit saaffiginissut tigusimallugu, saaffiginnissutigineqartullu suliarineqarnerani oqaaseqartoqarsinnaanngitsoq erseqqissaatigineqarluni.