Kangaamiormiut nutaamik talittarfittaarusuttut
Kangaamiuni innuttaasut atsiornernik katersuisut sinnerlugit kommunalbestyrelsimut ilaasortaq, Tønnes Kreutzmann, Atassut, taama tusagassiorfinnut nalunaarummini allappoq.
- Ukiut 15-it angullugit talittarfimmik nutaamik kissaateqarnerput naammalerpoq, nutaamik talittarfilortoqarli! Kangaamiormiut atsiornernik katersisut taama allapput imalu nangillutik.
- Royal Arctic Linep pajuttaatit nutaat 2015-imi 2016-imiluunniit atuligassai nunaqarfitsinnut akornuteqanngitsumik talissinnaassappata, pisariaqarpoq nutaamik talittarfiliortoqarnissaa, taamaattoqassanngippat 1950-ikkuni pissutsinut ikaarsaassaagut, prammersuillu atorlugit nioqqutissanik allanillu ikaassuinerit atuleqqillutigit, Kangaamiormiut allapput.
Sanaartornermik Ilinniarfik, ARTEK suleqatigalugu Qeqqata Kommunia siorna misissuisitsipput, talittarfiuliortoqarpat tamassuma qanoq akeqarnissaanik. Misissuinerullu tamassuma inerneraa, talittarfik nutaaq, 8 milionit koruunit missaannik akeqassasoq, naak siusinnerusukkut misissuinermi oqaatigineqaraluartoq talittarfiliorneq, 20-30 millionit koruuninik akeqassasoq, Kangaamiormiut sinnerlugit taama allappoq, kommunalbestyrelsimut ilaasortaq, Tønnes Kreutzmann.