Kalaallit uummatikkut suliaritinniartut pitsaanerusumik atugassaqartinnissaat sulissutigineqartoq
Tamanna allakkani nutaarsiassani Rigshospitalimeersuni Glostrup Hospitalimeersunilu atuarneqarsinnaavoq.
- Kalaallinut napparsimasunut atatillugu qanoq katsorsaanissarput piffissami sivisuumi misissugarigatsigu, taakkumi pisariaqartitaat immikkorluinnaq ittuummata, napparsimasunik sullissinermi peqqissaasoq Jane Færch, Uummatinut Immikkoortortaqarfimmeersoq allakkani taama issuarneqarpoq.
Oqaatsit aporfiusartut
Taamaattumik Uummatinut Immikkoortortaqarfiup kalaallit napparsimasut angerlarsimaffiata pisortaanik, nutserisumik ataqatigiissaarisumillu qanittukkut ataatsimeeqateqarpoq, kalaallit suliaritikkikiartortut pitsaanerusumik sullinneqarnissaat oqaloqatigiissutigineqarluni.
Oqaatsitsigut ajornartorsiutit napparsimmaviup unammiligassaannut ilaapput.
Tamanna tunngavigalugu siunnersuutigineqarpoq, napparsimasoq unitsinneqannginnermini, nakorsamik, peqqissaasumik nutserisumillu misissoqqissaarneqarluni ataatsimeeqatigineqartassasoq, napparsimasormi taamaalilluni pisussanut piareersimanerussammat, napparsimasullu ulluinnarni eqqarsaatigisaminnik anitsisinnaaniassammata.
- Tamanna napparsimasumut uatsinnullu iluaqutaassaaq, uummatinut napaatinut immikkoortami peqqissaasoq Lene vibe Høyer allakkani nutaarsiassani taama issuarneqarpoq.
Uummatinut immikkoortortaqarfik kalaallisut oqaasilimmik peqqissaasumik maanna atorfeqartitaqarpoq, tamannalu iluaqutaasimaqisoq oqaatigineqarluni.
