Nunat Avannarliit Killiit Siunnersuisoqatigiivi: Kalaallit tikilluaqqusaapput
- Inuit marluk annullutik nuanninngitsumik qisuariarnermata islandermiut assut kanngusupput. Amerlasuut ingerlaannaq aamma qisuariarput, islandermiummi akunnerminni taamatut pisoqarsimanera kusanaagimmassuk, Kalaallit, Savalimmiormiut Islandimiullu suleqatigiinnerulernissaannik suliaqarfimmi Nunat Avannarliit Killiit siunnersuisoqatigiivisa allaffianni pisortaq Inga-Dora Markussen, maanna Islandimiittoq, oqarpoq.
AAMMA ATUARUK Sakkutuut immikkut sungiusakkat ujarleqataalilersut
Niisa Trawlimik piginnittoq Svend Christensen KNR-imut oqaluttuarpoq, Regina C-mi inuttat, arnap 20-nik ukiullip periarfeerunneqarnerata kilisaammilu Polar Nanormi inuttat pingasut politiinit tigusarineqarnerisa malitsigisaanik tujormisinneqarsimasut, assersuutigalugulu pisiniarfimmit aneqquneqarlutik.
- Kalaallit tamarmik taamaattuusorineqarput tamannalu taakkununga tuttussaanngilaq, Svend Christensen KNR-imut oqarpoq.
Kisianni piviusoq taamaanngitsoq, Inga-Dora Markussen oqarpoq.
- Inuit marluk qisuariarnerat peqqutaalluni taamatut inerniliineq ingasappallaarujussuarpoq. Aamma islandermiorpassuit kalaallinut tapersiinertik oqaatigaat kammagiinnertillu tassunga killinngitsoq oqaatigalugu. Takutittariaqarparput suleqatigiissinnaasugut, Inga-Dora Markussen oqarpoq.
Nunami sumiluunniit inoqarpoq kusananngitsumik qisuariartartunik Islandimili amerlanerussuteqartut naapertuilluarnermik aallavilimmik qisuariartartut, pisortaq oqarpoq.
- Amerlanerussuteqartut oqaasii aallaaviginiartigit, ikittunnguit taakkua kisiisa pinnagit. Kalaallit Islandimut tikilluaqqusaapput.
