ASSIT Kalaallit sungiusarluarnerusariaqartut
Nunanut allanut unammisartut sapaatiummat Vanløse IF unammivaat, ippassarlu B.93 Københavnimeersut unammillugit. Unamminerit tamarmik Kalaallit målimik ataatsimik ajorsarput.
Nunanut allanut unammisartut ullualuinnaat sungiusaqatigiissimaneri Vanløse IF-imut unamminermi arsarluarpallaannginnerannut pissutaasut ilagigaat Nukannguaq Zeeb oqaluttuarpoq.
- Arsartut affai nunanut allanut unammisartutut siullermeerlutik peqataapput, taamaammallu taamatut angalaneq ilaannut tupannalaarsinnaallunilu nutaajuvoq.
- Aamma unammisartoqatigiilluta ullualuinnaat sungiusaqatigiikkatta, unammineq siulleq immitsinnut ilinniarfittut misileraaffittullu atorparput.
- Taakkulu saniatigut arsariaasissarput atiniarsaralutigu, Nukannguaq Zeeb nunanut allanut unammisartoq KNR-imut oqarpoq.
Kalaallit siuttuata, Nukannguaq Zeebip, Vanløse IF-imut unammineq iluatsilluannginnerarpaa. Ass. Vanløse IF.
Iluatsikkiartortoq
Nukannguaq Zeebip Kalaallit arsaqatigiinnerat iluatsikkiartornerarpaa.
- Ullormut marloriarluta sungiusartarnitsinni immitsinnut ilisarisimalluarneruleriaratta arsarluarnerulertugut malunnarpoq.
- B.93-imut ajorsaraluarluta arsarluarpugut. Arsarnerput nuannerpoq unammisagullu pikkorillutik, taamaammat ajorsaraluarluta unamminerput naammagisimaarparput, Nukannguaq Zeeb oqaluttuarpoq.
Kalaallit Danmarkimi sungiusaqatigiinnerminni aatsaat imminnut sungiukkiartulerput. Ass. GBU.
Tuniusimanerusariaqartut
Kalaallit Vanløse IF-imut, arsaateqattaartarnerit pitsaanerpaat sisamaannit unammisartunut (Danmarksserienimiittunut), aammalu B.93-imut, arsaateqattaartarnerit pitsaanerpaat pingajuanni (2.divisionimi) unammisartunut ajorsarput.
Kalaallillu unammisatik naliginerulissagunikkit sungiusartarnerminni tunniusimanerusariaqartut, unammisartoq misilittagartooq isumaqarpoq.
- Nunatsinni ataavarnerusumik sungiusartarnissaq pisariaqarpoq.
- Angummatissagutta ulloq allortarlugu sungiusartarneq naammanngilaq. Ullut tamaasa sungiusartariaqarpugut, ajornanngippat ullormut marloriarluta sungiusartariaqarpugut, Nukannguaq Zeeb isumqarpoq.
Aqagu sisamanngornermi Kalaallit Aarhus Fremad 2. divisionimi unammisartunut unammilerunik ajugaaniarsarissasut, Nukannguaq Zeeb naggasiivoq.
Qallunaat kalaallinit aallariallaqqinnerunerat, Nukannguaq Zeebip maluginiarpaa. Ass. Vanløse IF.