ISLAND GAMES Kalaallit semifinaalimut annguttut

Kalaallit arsaattartuisa angutitai Gotlandimut pissanganarluinnartumik ajugaallutik semifinaalimut anngupput.
Assi © : Peter Vest
Allattoq Mads Pedersen
juunip 27-at 2017 16:12

Kalaallit Gotlandilu unamminermi pingaarutilimmi unammimmata unammineq naligiiffioqaaq. 

Muminnginnermi siukkaq Norsaq L. Mathæussen isertitsivoq kalaallit 1-0-imik siuartillugit. Taasuma kingorna kalaallit eqqissisimakannerlutik siuaqqanertik illersorsinnaanngorpaat. 

Gotlandimiut arsaq paarinerugaluaraat kalaallit sassusseriasaartarnermi ulorianarnerupput isertitseriaqattaartarlutillu. 

Mumereernermi Gotland sassussisaqattarpoq. Kalaallillu måliniittuat Looqi Svane unammilluaqaaq, Gotlandilu isertitsiaarsimasinnaagaluartoq annaassilluni. 

Mumereernerup qiteqqunnerani Gotland isertitsivoq.  Looqi Svaneli kukkuluttorfigineqarsimammat isertitaat atortussaatinneqanngilaq. 

Unamminerup annerpaartaa kalaallit måliata saavani pivoq, Gotlandilu isertitsinissamut periarfissarsiuinnaavilluni. Kalaallit arsariaasertik atiuminaatsippaat. 

Mumereernermi minutsit 22 ingerlareersullu Nukannguaq Zeeb dommerip aalajangiinera naammagittaalliutigereerlugu aappassaa sungaartumik nittaavigitilluni aappaluttumik nittaavigitippoq. 

Kalaallit ikinnerussuteqaleraluarlutik arsaq paarinngikkaluarlugu sukataarnerulerput arpannerulerlutillu. 

Minutsit quliinnanngortut Gotland frisparkerlutik isertitingajaavipput. Looqi Svaneli aammaarluni pingaaruteqarluinnartumik annaassivoq. 

Kalaallit isertitsinissamut periarfissaat siulleq unamminerup naammassilluinnarlernerani pivoq, målilli napasua eqquinnarlugu. 

Unamminerup naammassilluinnalernerani kalaallit dommerip siggareernerani piffissaq atorluartarpaat arsarlu paariniarsalisarlugu. 

Kiisami dommerip unammineq naammassinerani siggarmat kalaallit nuannattunnguupput. Looqi Svanep annaassisaqattaarneratigut kalaallit semifinaalimut anngupput. 

Semifinaalimi Menorca unammissavaat.

Unamminerit ataani takukkit.