Kalaallit puallariartortut
Puallaraluttuinnarpugut. Tamanna ukiut 50-it ingerlanerini paasisat takutikkaat Nakorsanut-mi allaaserineqarpoq
Siornatigut Nunatsinni pualavallaarneq illoqarfinniunerusoq atuussimasoq nunaqarfinni maanna takussaanerulerpoq. Tamanna misissuinermi erserpoq atuagassiamilu Nakorsanut-mi saqqummiunneqarluni.
Misissuinerup soqutiginaqautigaa Nunatsinni pualavallaarneq pillugu paasissutissanik 1963-imeersunik peqarmat.
Paasissutissat 1963-imeersut ukiut qulit qaangiummata piaarinaatsoornerinnarmik nassaarineqarsimasut Nakorsanut allaaserisaqarpoq. Paasissutissallu taakku 1998-imi 2008-milu paasisanut sanilliullugit atorneqarsimapput, Nunatsinnilu oqimaassutsikkut ineriartorneq takuneqarsinnaalersimalluni.
Pualavallaarneq Nuummi siornatigut ersarinnerusimavoq. Ukiunili qulini kingullerni illoqarfinni minnerni nunaqarfinnilu puallariartorsimapput. Ullumikkullu sinerissami pualavallaartut Nuummisut amerlatigilersimapput.
Misissuinermi kalaallit kiataat allanit anginerusinnaasarnerat eqqarsaatigineqarsimavoq. Tamannalu tunngavigalugu nunatsinni innuttaasut 40 procentii pualavallaartutut nalilerneqarsimallutik.
