Timersorneq

Kalaallit nunarsuarmi pissartanut ajorsarput

Kalaallit Nunaata pisortatigoortumik suli misiginikuunngilaa, tassa timersornerup silarsuaani nunarsuarmi pissartamik unammisaqarluni. Ullumikkulli taama pisoqarpoq. Kalaallimmi arnartaat assammik arsarlutik nunanut allanut unammisartut nunarsuarmi maanna pissartaasut Brasilia Cubap illoqarfiisa pingaarnersaanni Havanami ullumi naapippai. Amerikap nunavittaani assammik arsarluni unammersuarneranni Kalaallit Nunaat Brasilialu unammipput.

Allattoq Mads Lynge

maajip 23-at 2015 17:51

Oqaatigilluaannaraannilu: Kalaallit ajoraluartumik ajorsarput.

Kalaallillu arnartaat unammillualaavissut nunanut allanut unammisartut sungiusaasuata Jakob Andreassenip Radioaviisimut SMS-ikkut oqaluttuaraa.

Brasilia 32-12-imik ajugaavoq, unammisut muminneranni 18-6-imik siuaqqallutik.

- Unammillualaavippugulli, Brasiliamiullu unamminerup immikkoortuata aappaani 14-eriaannaq isertitsillutik, nunanut allanut unammisartut sungiusaasuat ilaatigut taama allaaserisaqarpoq.

Kalaallillu arnartaat Brasiliap nunanut allanut unammisartuisa sungiusaasuannit qallunaamit Morten Soubakimit nersualaarneqaqaat, naallu misilittagaqarpallaanngikkaluarlutillu unammisanut naleqqiullugu sakkortunnginnerugaluartut angusaqarumallutillu unammerusussuseqartut, Jakob Andreassenip oqaatigaa.

Najaaja Lyberth, Panu Grønvold kiisalu Mia Rasmussen kalaallit arsartartuini isertitsinerpaapput, tamarmik immikkut pingasunik isertitaqaramik.

Kalaallit USA-mut aqagu unammissapput, Nunatta nalunaaqutaa naapertorlugu ullaakkut nalunaaqutaq qulingiluanut unammissallutik.

Kalaallit nunarsuarmi pissartanut ajorsarput

Aamma atuaruk