Kalaallit Nunaata Chile ajorsarfigaa
Unamminerup pingaaruteqassusia unammineq aallartiinnartoq paasinarsereerpoq, unammisartummi sekundialuit ingerlareersut aporaatillattaalereeerput.
Unammineq kalaallinut assigiinngitsorpassuartigut akisunaarneqarpoq. Nikinnermi 12-13-imik kinguaqqasinnarlutik unamminerup naammassinerani 29-24-mik ajorsarput.
Ajoraluartumik Minik Dahl Høegh minutsini 20-ni unammereerluni isikkamigut ajoquserpoq aniinnartariaqarlunilu. Andreas Lorentzen imeqqutaminik nukkilisitsisoorpoq Angutimmarik Kreutzmannilu chilemiut ajuutititsinaveersaartuinit sakkortuupilussuarmik pineqarami Mexicomut aqagu unamminissamut peqataanissaa qularnarpoq.
- Dommerit unamminermi taama sakkortutigisumik pissusilersortoqarneranik akuersaaginnarnerat tupigusuutigaara, ingammik unamminerit sinneri qanoq naliliisoqartarsimanera eqqarsaatigalugu. Unamminerup immikkoortuani siullermi malinnaalluarpugut, chilemiullu unamminermut piareeraarluarsimammata unammisartutsinnullu pingaarnernut sakkortuuliornerat akuersaaginnarneqarpoq illuatugaatigullu isumaqarpugut nunammisartuvut chilemiut unammisartuinut assinganik sakkortuulioqquneqanngitsuy, nunanut allanut unammisartut sungiusaasuat Niels Møller oqarpoq.
Nunanut allanut unammisartut sungiusaasuat aamma isumaqarpoq chilemiut qulingiluariarlutik straffertinneqarnerat kalaallillu marloriaannarlutik straffertinneqarnerat unamminermi kikkut sakkortusaarnerunerannut naapertuuttumik ersersitsinngilluinnartoq.
- Unammisartuvut akiuulluarput sapinngisartillu tamaat tunniussaqarlutik, unamminermili taama sakkortutigisumi tamanna ajorarluartumik naammanngilaq. Mexicomut aqagu unammilerutta kikkut unammeqataasinnaassanersut takussavarput. Tamarmimmi piareersimanngippata sapaatiuppat gruppit marluusut akornanni unamminerit sioqqullugit aqagu Mexicomut unamminissarput ilungersunanaarsinnaavarput, Niels Møller naggasiivoq.
Gruppe A-mi Brasilia siuaqqavoq, Uruguay, USA Guatemalalu kinguaqqallutik. Gruppemi B-milu Argentina siuaqqavoq, Chile, Kalaallit Nunaat Mexicolu kinguaqqallutik.
