Kalaallit Nunaat siunissami qanoq ikkumaarneranik isumasioqatigiipput
Aningaasaqarnermut Siunnersuisoqatigiit siulittasuata Torben M. Andersenip isumaqasioqatigiinnermi peqataasut saqqummiussaannut isumalluarpoq.
- Sulianut tunngasunut atorneqarsinnaasunik isumassarsianillu pissarsisoqarsimanissaa neriuutigaara oqallinnerup ingerlateqqinneqarnisaannut iluaqutaasussanik, Torben M Andersen oqarpoq.
- Inuussutissarsiutit pillugit politikki namminersortut nukittunerulernissaannut iluaqutaasussaq pisariaqartinneqarpoq, saqqummiussisullu amerlasuut pisariaqartippaat. Tamaattumik neriuppunga isumasioqatigiittoqarnerani qanoq iliortoqarnissamik susoqarnissammillu annerusumik oqallineq nanginneqartumaartoq, Torben M. Andersen oqarpoq
Isumasioqatigiinnermi Namminersorlutik Oqartussat sinnisaannik aamma inuussutissarsiutinik ingerlaqartut peqataapput. Isumasioqatigiinneq ukiut kingullit sisamat ukiut tamaasa pisarpoq, ilisimatusarfimmiilli ilinniartut siullermeerlutik peqataatinneqarput. Tamannalu tunngavissaqarluartoq Torben M. Andersen oqarpoq.
- Isumasioqatigiinnermi oqaatigineqartut tusarnaarsinaavaat isumassarsiorfigalugillu aamma uagut illuatungaanit pissarsissaagut. Ilinniagaqartut susoqarnersoq ilisimavaat malinaallutillu, inuusunnnerusut sinnerlugit taakua peqataasutut naatsorsuutigineqarsinnaammata.
- Tassami isumasioqatigiinnermi saqqummiunneqartut Kalaallit Nunaat siunissami qanoq ittuussanersoq pineqarmat, Torben M. Andersen oqarpoq.
Ilisimatusarfimmi inuiaqatigiilerinermik ilinniartoq Tukumminnguaq Nykjær Olsen isumasioqatigiinnermi peqataanera ilinniarfiulluarpoq, isumasioqatigiinnermi saqqummiunneqartut arlaqartut ilisimatusarfimmi ilinninerminni ilinniartitsissutigineqanngimmata.
- Ilisimatusarfimmi ilinniartitsissutigineqanngitsut isumasioqatigiinnermi ilinniarsinnaasagut arlaqarput, Tukumminnguaq Nykjær Olsen oqarpoq.
- Assersuutigalugu inuusutissarsiutit pillugit oqalunnissatsinnut oqallinnissatsinnullu periarfissinneqarpugut.
- Taamaattumik aaqqissuussinermut qaaqqussaasimanerput isumassarsiorfigalutigu angusaqarfigisorujussuuarput, Tukumminnguaq Nykjær Olsen oqarpoq
TUSARNAARUK Miniseminar om produktivitet og effektiviseringer Optagelse fra Økonomisk Råds seminar lørdag den 9. april på hotel Hans Egede (qallunaatuuvoq)
