Kalaallit Nunaat Hawaii Ironmanimut siullerpaamik peqataatitaqarpoq

Nunarsuarmimi oqilaniunnerit sakkortunersaat ilaat Hawaii Ironman arfininngormat ingerlanneqarpoq, Nunatsinninngaanniillu siullerpaamik peqataasoqarpoq.

Jens Bjerge, 50-inik ukiulik, 3,9 kilometerinik naluppoq, 180 kilometerinillu sikkilerluni, naggasiutigalugulu marathonerluni. Bjergep katillugit atorpai akunnerit aqqanillit, minutsit 54-it sekundillu 40-t.

Naak silaannaq 32-nik kiakkaluartoq, aqqusinermilu 38-nik kiakkaluartoq, maanna Nuummiu Hawaiimi peqataanini nuannaarutigaa:

- Tanngassimaarnaqaaq taamatut Hawaii Ironman naammassisimallugu. Arpannertaa imaannaanngitsorujussuuvoq. Tusaamasimagaluarpara qanoq kiatsiginersoq, kisianni aatsaat apuukkama paasivara sunaaffa taama kiatsigisoq, Jens Bjergep Hawaii Ironmanimut peqataanermini misigisani taama ilaatigut oqaluttuarai.

Aamma atuaruk Jens Bjerge Hawaiimi Ironman VM-imi unammeqataavoq

Aqqut isorartooq kiaqisorlu

Arpannerup nalaani kiassimaqisoq taassuma oqaluttuaraa, sikkilernertaanilu anoreqalaarnera iluarisimallugu. Arpannerup aallartinnerani illoqarfiup iluani arpapput, inuppassuillu isiginnaarlutik. Taamaalereermallu illoqarfik qimallugu inoqajuitsutut nalilerneqarsinnaasumik arpaffeqarlutik:

- Inoqajuitsuusakkut arpakkatta kiattorujussuuvoq, taarnartaa assut sakkortuvoq. Kisianni kilometerit kingulliit apukkiartorluni inuppassuit akornannut pilluni misigissutsit sakkortungaatsiartut takkussuupput, nuannersorujussuuvoq apuulluni, 50-inik ukiulik Jens Bjerge, Nuummi maanna najugalik, taama oqarpoq.

Taanna Copenhagen Ironmanimut aappaagu peqataassamaarpoq, Nuummiut taamaammat Jens Bjerge Nuup aqqusernini sungiusartoq takusinnaassagunarpaat.

Jens Bjerge sulisitsisuminit, Nukissiorfiit, aammalu Elite Sport Greenlandimit, InuIT-mit, Qarsoq Tegnestuemit, In Fashionimit, Ittu.net-imit aamma Profil Optikkimit taperserneqarpoq, taakkulu ikiuilluarsimanerannut timersortartup qujaniarfigai