Kalaallit Nunaat BBC-mi oqalliseqataavoq

Naalakkersuisut siulittaasuat Kuupik Kleist, Kalaallit Nunaat sinnerlugu peqataavoq. Inuit Issittormiut Siunnersuisoqatigiiffiata, ICC-p, siulittaasua Aqqaluk Lynge aamma peqataavoq.

Issittoq aallakaatitami immikkut sammineqarpoq, The World Debate-imi qulequtaq: The Arctic - Resource or Reserve, kalaallisuunngorlugu 'Issittoq - Pisuussutinik iluaquteqarneq - Eqqissisimatitarlunniit?'

Sverigemi Nunanut allanut tunngasunut ministeri Carl Bildt, Issittumi Siunnersuisoqatigiinni siulittaasunngoqqammersoq, peqataavoq, soorlu aamma Norgep Nunanut allanut tunngasunut ministeria Jonas Gahr Støre peqataasoq.

Kuupik Kleistip peqataanera, ICC-p siulittaasuata Aqqaluk Lyngep nuannaarutigaa. "Kuupik Kleist, tuluttut oqallorissaaqisoq nunatsinnik ilisarititsilluartuummat", Aqqaluk Lynge oqarpoq.

- Kuupik Kleistip Kalaallit Nunaata naalakkersuinikkut namminersortuunera erseqqissarpaa, pingaartumik pisuussutinik sunilluunniit atuisinnaatitaaneq Kalaallit tamakkiisumik aalajangiisinnaassuseqartumik oqartussaaffigigaat erseqqissarlugu, Aqqaluk Lynge allappoq.
Oqalliseqataasut allat marluk, tassa Carl Bildt aamma Jonas Gahr Støre, isumaqataapput.

Aqqaluk Lynge aallakaatitsinerup nalaani aamma oqaaseqartinneqarpoq. Tusarnaartut oqalliseqataallutillu apeqquteqarsinnaaffianni Aqqaluk Lynge oqarpoq:

- Issittoq inoqajuitsuunngilaq, asuli aallerneqarfigisinnaasoq, inoqareermalli taakkulu eqqornerlunneqannginnissaat eqiingaffigineqartariaqartoq, Aqqaluk Lynge ilaatigut oqarpoq,
Inuit issittormiut Issittormiut Siunnersuisoqatigiivini immikkorluinnaq ilaasortaanerat eqqaamaqqullugu.

The World Debate immiunneqarmat KNR-ip atortui atorneqarput, teknikeriilu sulisorineqarlutik.