Kalaallit Nunaat aatsitassanik piiaaffinngoqqingajalerpoq

True North Gemsimi maanna aningaasaliisussarsisinnaasimavoq, Qeqertarsuatsiaallu eqqaanni Aappaluttumi rubininik safirinillu piiaasinnaalernissaq pillugu isumaqatigiissusiorsinnaanngussalluni.
Allattoq Mads Lynge
septembarip 12-at 2014 06:02

Sanaartugassanik suliassinneqartartut Norgemeersut Leonhard & Sønner, LNS, aningaasaliisuupput. Taakku True Gemsip tallimaraterutaanik piginnittuupput, Canadamiut dollarinik 11 millionit dollarinik, imaluunniit 58 millionit koruuninik aningaasaliiniarlutik.

AAMMA ATUARUK Norgemiup aningaasaatilissuup piiaaviliornissaq qilanaarivaa

- Aningaasaliiumasinnaasut arlaqarmata iluatsitsivugut, iluarsiissutissatullu isumaqatigiissutigisaqarnitsinni aningaasaliinerit ima isikkoqalerput aatsitassanik ingerlaannangajaq piiasinnaalissalluta. Taassuma saniatigut nalunngilluakkatsinnik tatigisatsinnillu aningaasaliisussarsivugut, pilersaarusiorluarsinnaasuullunilu, True North Gemsip pisortaa Bent Olsvig Jensen oqarpoq.

Suliniut soqutigineqarluartoq
Aappaluttumi piaalernissaq soqutigineqartorujussuuvoq, sulilernissaminnullu qinnuteqarsimasut 300-t sinneraat, pisortaata ilisimatitsissutigaa.
 
- Qinnuteqartut tamakkersinnaanngilavut. Qinnuteqaateqarsimasorpassuilli naatsorsuutigissavaat nalunaarsorneqarlutillu tutsuiginartumik suliarineqassasut. Tassami sivisuallaanngitsumik sivisunerusumilluunniit sulisinnaasut pillugit ilungersuuteqassaagut, kingusinnerusukkullumi sulilersinnaasut pillugit aamma, Bent Olsvig Jensen oqarpoq.

AAMMA ATUARUK Rubinisiorfissaq piariilerpoq