Kalaallit Nunaanni imminortut amerlavallaarput

Imminortarneq radioaviisimi immikkut sapaatip-akunnerani matumani sammineqassaaq, ilaatigut imminoriarsimasut taamatullu imminorsimasut ilaqutaat tusagaqarfigissallutigit.

Paarisami kisitsisinik missisuinermi erserpoq ukioq 1990-imiit 2006-ip tungaanut inuit 884-it Kalaallit Nunaanni imminorsimasut.

Imminorsimasut misissoraanni, nunatsinni imminortartut inuusuttuunerupput – amerlanerpaartai tassaallutik angutit inuusuttut 15-it 25-illu akornanni ukiullit.

Nunani allani imminortarnernik misissuinerit takutippaat, taakkunani imminortartut tassaanerusut utoqqasaat utoqqaallu.

Paarisami imminornaveersaartitsinermik suliaqartoq Julia Dorph Lyberth nunatsinni pissutsit pillugit ima oqarpoq:

” Kalaallit Nunaanni imminut toquttartut amerlasoorujussuupput, taamaanneralu aarlerinarpoq, pinaaveersaartinissaalu pimoorunneqartariaqarluni.

Julie Dorp Lyberth oqarpoq.

Imminortarnerup pinaveersaartinissaannut saaffigineqarsinnaasut atuarneqarsinnaasullu KNR-ip nittartagaani KNR.GL -imi atuarneqarsinnaapput.