Nalunaarusiaq Kalaallit meerartaat Danmarkimiittut oqimaattorsiortut
Meeqqat kalaallit arfineq marluk Danmarkimut nuussimasut kulturi nutaaq iserfigisartik pillugu misigisaminnik oqaluttuarsimapput, misissuinerlu Danmarkimi meeqqat pillugit siunnersuisoqatigiit, Børnerådip suliaraa. DR.DK allappoq.
Danmarkimi meeqqat pillugit siunnersuisoqatigiit isumaqarput, nuna tamakkerlugu iliuusissamik pilersaarusiortoqartariaqartoq, matumani kalaallit Danmarkimiittut ilaatinneqarlutik.
Danmarkimi kalaallit meerartaasa talllimararterutai imaluunniit meeqqat 600-t eqqorneqarsimasut, Kalaallit meerartai pillugit peqatigiiffimmi, generalsekretæri Puk Draiby naliliivoq.
- Kalaallit meerartai amerlasuut nipaattuupput, imaassinnaasarpoq aamma atuarfinni klassiniitillutik qallunaat atuaqatitik peqatigitillugit assigiimmik qallunaat oqaasiinik paasinnittaaseqanngitsut, ersarissumik pinnguarnissamut isumaqatigiissimasanngillat kalaalillu meerartai kiserliorsinnaasarput matoqqasinnaasarlutillu, Puk Draiby oqarpoq.
AAMMA ATUARUK Attaveqaqatigiit Danmarkimi efterskolertunik tapersersuinerat iluatsilluartoq
Kalaallit meerartaat ikkatarineqassasut
Naak meeqqat pineqartut amerlagisassaanngikkaluartut, Børnerådimi siulittaasoq Per Larsen isumaqarpoq meeqqat malugineqarnissaminnut pisinnaatitaaffeqartut.
- Misissuinermi meeqqat misigisaat pillugit pisortanut minnerunngitsumillu kommuninut tamanut nalunaarutaavoq. Kalaallit meerartai akimmiffeqartarsinnaapput tamannalu eqqumaffigisariaqarparput, qaangiiniarnissaannullu ikiuulluta, Børnerådimi siulittaasoq Per Larsen oqarpoq.
AAMMA ATUARUK Nunarput kalaallillu qallunaat nunaanni ilisimanerulerlisigit
Kalaallisut atuartinneqarneq ajortut
Tassa ersarilluinnarpoq, kalaallit meerartai namminneq oqaatsiminnik ilinniartinneqarneq ajortut,
naak meeqqat atuarfii pillugit inatsimmi pisinnaatitaaffeqaraluartut.
-Sumiiffinni arlalinni periuseq atorneqarpoq, sumiiffinnili allani aamma atorneqarani, ilaatigut inatsisip atuunnerannik ilisimasakinnermik pissuteqarsinnaavoq, aammali sumiiffit ilaanni kalaallisut oqalusinnaasunik pissarsiniarneq ajornarsinnaasarluni, Danmarkimi Børnerådimi siulittaasoq, Per Larsen DR-imut Rikke Bondesenimut taama oqarpoq.
