Kalaallit marluk Danmarkimi pisuujunerpaat 100-t akornanniittut
Polar Seafoodimik piginnittut Anders Brøns aamma Jens Salling, Berlingskep Danmarkimi pisuujunerpaat 100-t allattorsimaffianut ilanngunneqarput.
Anders Brønsip Jens Sallingillu aalisakkanik raajanillu suliffeqarfissuaq Polar Seafood tamarmik immikkut 50 procentinik piginneqataaffigaat. Suliffeqarfissuaq siorna 3 milliardit koruunit missaannik kaaviiaartitaqarpoq akileraarutillu ilanngaatiginagit 335 millionit koruuninik sinneqartooruteqarluni.
Anders Brønsip 66-inik ukioqartup Jens Sallingillu 67-inik ukioqartup tamarmik immikkut aningaasaataat 1,4 milliardit koruuninut naatsorsorneqarsimapput, taakkulu Berlingske Business Magasinip Danmarkimi pisuujunerpaanik allattorsimaffiani normu 79-itut 80-itullu inissisimapput.
Milliardærit iluatsitsilluartut
Polar Seafoodip ukiuni 32-ni oqaluttuarisaanermini siorna aatsaat taama angusarissaartigivoq. Iluatsitsilluarnermullu nalaatsornikkut iluatsitsineq pikkorissuseqarnerlu pissutaasut, milliardærip aappaata oqaatigaa.
- Pikkorissuseqarluarpugut, aammali nalaatsornikkut iluatsitsisimalluta, Nunatsinni Danmarkimilu pikkorissorsuarnik sulisoqarpugut. Aamma niuernitsinni aalisakkat pingaarnerutillugit ingerlatsivugut. Ataasiarlutali akunnittarfimmik pisinikuuvugut, taannali akiliisinnaajunnaarluni, Anders Brøns Business.dk-mut taama oqarpoq.
Peqqissuunertik pisuussutigigaat
Brøns pisuujunerluni aperineqarami akissutaa tunuarsimaarpaluppoq.
- Aap, allarpassuarnut naleqqiullunga aningaasaatilissuuvunga. Uannulli tamanna pingaarnerpaajunngilaq. Peqqissuunera pisuussutigaara, Brøns oqarpoq.
Anders Brønsip Jens Sallingillu siulersuisuini siulittaasorisaata Henrik Lethip Polar Seafoodimik piginnittut tamarmik immikkut 1,4 milliardinik naleqarneragaanerat eqqunnginnerarpaa. Lethip Berlingske Businessimut oqaatigaa aviisip natsorsuineranit suliffeqarfissuaq nalikinnerungaatsiartoq.
