Illersornissamut qullersaqarfik: Kalaallit inuusuttut sakkutuujusussaanermut nammineq nalunaarsinnaanngussapput

Isumaqatigiissumi allassimavoq: ”Nammineq kajumissutsiminnik sakkutuujusussaatitaaniartunut misiliineq Kalaallit Nunaanni ingerlanneqassaaq”. Taama oqaasertaliorneq paatsuunganermik pilersitsivoq, nunatsinnilu sakkutuujusussaatitaanermik atuutsilersitsisoqarsorineqarluni.

Kisianni ’Sakkutuujusussaatitaasutut misilitsinneq’ siornatigut ’session’-imik taaneqartartoq tassaavoq Danmarkimi angutit inuusuttut 18-ileereersimasut misissortinnissamut qaaqquneqartarnerat sakkutuujusussaatitaasutullu toqqarneqarsinnaasarnerat.

”Kalaallit Nunaanni nammineq kajumissutsiminnik sakkutuujusinnaatitaasussatut nalunaarsinnaaneq tassaaginnarpoq session nalinginnaasoq”, Illersornissamut ministereqarfik KNR-imut allakkatigut paasissutissiivoq.

AAMMA ATUARUK Politiit qarasaasiakkullu isumannaallisaaneq illersornissaq pillugu isumaqatigiissummi nukittorsarneqartut

Sakkutuujusussaatitaaneq ullumikkut nammineq kajumissutsiminnik peqataarusuttunoorpoq. Tassa Illersornissaq pillugu ullorititamikunngeqarfimmi tamarmi inuusuttut sakkutuujusussaatitaanermut nalunaarsinnaapput. Kalaallilli inuusuttut Danmarkiliaqqaarlutik nalunaarnissaat ullumikkumut piumasaqaataasimavoq.

Illersornissaq pillugu sumiiffinni assigiinngitsuni ulloqartitsisoqartalissaaq.

Tamatuma saniatigut kalaallit sakkutuujusussaatitaalernissaminnik aalajangertut sakkutuujunerminni nunatsinnut angerlarnerminni akeqanngitsumik angalasinnaalerlutik.

AAMMA ATUARUK Sakkutuujutitat nunatsinniissinnaalissasut

Nunatsinni upalungaarsimanissamut ilinniakkamik nutaamik pilersitsineq Illersornissamut isumaqatigiissummi nutaatut pilersinneqarpoq.
 
Ilinniagaq taanna innuttaasut kikkulluunniit peqataaffigisinnaavaat tassanilu nammineq kajumissutsiminnik peqataasutut upalungaarsimanermi suliani assigiinngitsuni soorlu imaani annaassiniarnermi, ujaasinermi ikiueqqaarnermi allanilu peqataanissamut ilinniartinneqassapput.
 
Ilinniagaq qanoq sumilu inissinneqassanersoq suli aalajangerneqanngilaq.

AAMMA ATUARUK Forsvarsforlig giver medansvar til Grønland