Ilinniarneq

ASSIT Kalaallit inuusuttut arfineq-marluk Georg Stagemut ilaapput

Georg Stage ungasissumut angalassalluni sisamanngormat maajip 19-iani avalammat Kalaallit inuusuttut arfineq-marluk aallaqataapput.

Allattoq Simon Uldum -

maajip 20-at 2016 09:45

Nutserisoq Connie Fontain

Kalaallit ilaasut tassaapput niviarsiaqqat marluk nukappiaqqallu tallimat:

Tukummeq Mikaelsen Qasigiannguarmiu, John Egede, Frank Bollerilu Maniitsormiut, Aviaaja Pike Rasmussen, Morten Poulsen og Emil Brummersted Nuummiut kiisalu Per Silassen Frederikshavnimiu.

Taakkulu qaammatini tulliuttuni Georg Stagemi imarsiornermik ilinniartut 63-it umiartoqatigissavaat.

Inuusuttut umiartortut 63-it Nunatsinneersut, Danmarkimit, Savalimmiunit Norgemeersullu sivisuumik nuannisarfiusumik ilinniarfiungaatsiartumillu umiarsuarmik pingasulimmik ilaatigut Lofoten, Ålesund, Shetlandip qeqertai, Antwerpen, Lisabon, Gibraltar, Madeira Tenerifelu angalaffigissavaat.

Antwerpenimiillu Lissabonimut ingerlanerminni umiarsuit tingerlaatillit sukkaniuunneranni Tall Ships Racemi peqataassapput.

Umiartornerat Tenerifemi septembarip aappaani naammassissaaq, atuartullu Københavnimut uterlutik timmisartorumaarlutik.