Kalaallit inuiaat allatuulli taqqamikkut milittoorsinnaatigisut uppernarsineqartoq
Kalaallit Nunaanni Peqqissusermik Ilisimatusarfiup Danmarkip naalagaaffiata innuttaasut peqqissusaannik misissuisoqarfianiittup misissuinerani nutaami tamanna atuarneqarsinnaavoq.
Kalaallit Europap killermiutulli taqqamikkut milittoorsinnaatigipput.
Kalaallit aamma naggueqatigiit inuit nalinginnaasumik nerisartagaasa aalisakkat orsuannik akoqarnerat pissutigalugu uummatimikkut nappaateqarnissaminnut illersugaanerunerannik ukiorpassuarni isumaqartoqarnera eqqortuunngitsoq misissuinermi uppernarsineqarpoq.
Aalisakkap orsuata iluaqutaanera erseqqissumik uppernarsineqanngilaq, taamaattumillu iluaqutaaneranik taamaassorinninneq uppernarsaatissaqarani.
Tassalu misissuinermi paasineqartoq tassaavoq kalaallit, inuiat allat assigalugit uummatimikkut naappaateqalersinnaanerat annertusoq.
Pujortartarnerup, pualavallaarnerup timip aalatinneqartannginnerata timersortannginnerullu uummatikkut nappaateqalersinnaaneq annertunerulersittarpaa.
Utoqqalinerusalerpugut utoqqaanerulernitsigullu uummatikkut nappaatit qaninnerulerneqarsinnaapput.
- Inuiaqatigiit kalaallit ukiut 50-it ingerlaneranni malunnartumik allannguuteqarput.
Issianerulerput, peqqinnanngitsunik nerisaqalerput amerlavallaartullu pujortartarput.
Kalaallit sukkornissaminnut qanittuaraasut aamma msissuinermi paasineqarpoq, tamannalu uummatikkut nappaateqalernissamut qanittuaraalluni.
Misissuisitsinerup inernera ataatsimut oqaatigissagaanni kalaallit uummatimikkut nappaateqalersinnaanerat annertuvoq, Maria Tvermosegaard Kalaallit Nunaanni Peqqissusermik Ilisimatusarfimmi ilinniartoq taama oqarpoq.
