Kalaallit Illuutaat ersarinnerulersinneqassaaq
AALBORG: Aalborgimi Kalaallit Illuutaanni pisortanngorlaaq, Søren Storch Nielsen, qaammat ataasiinnaq tassani atorfeqarsimagaluarluni pilersaaruterpassuaqarpoq.
Taakku ilagaat kalaallinut Jyllandip avannaani - aammalumi Aalborgimi - najugaqartunut siunnersuisarnerup ersarinnerulersinneqarnissaa, pisortaq Søren Stach Nielsen KNR-imut oqarpoq.
AAMMA ATUARUK Kalaallit ilinniagaqartut aningaasatigut ikiorserneqarsinnaanertik arajutsisarpaat
- Kalaalerpassuit Jyllandip avannaani najugaqartut Kalaallit Illuutaannut qaninnerusumik attaveqarsinnaanermik ujartuisimapput, uagullu Aalborgimi inissisimatilluta taamaattuaannanngilaq. Kalaallit nunap immikkoortuani najugaqartut amerlapput, taakkulu Aalborgimut ungasittumi najugaqarpata takorloorsinnaavara orniguffigalugitigit aatsaat qaninnerusumik attaveqarfigisinnaassallutigit, Søren Stach Nielsen oqarpoq.
Takorluugaalu tassaavoq, Aalborgimi Kalaallit Illuutaata qaammatit arlaqanngitsut qaangiuppata Hjørringimi Frederikshavnimiluunniit immikkoortortamik ammaasinnaanissaa, taannalu sapaatit-akunneranut marlussoriarluni ammatinneqartassasoq.
Taamaaliornikkut kalaallit Jyllandip avannaani najugaqartut amerlanerusut, assersuutigalugu Danmarkimi pisortat sullissinerannut tunngatillugu ikiortariaqartu,t amerlanerusunut anguneqarsinnaanngussammata.
Kalaallit oqaasii atorlugit ikiorneqarsinnaaneq pisariaqartinneqarpoq
Aalborgip Kommunia Folketingip 2013-2016-imut Kalaallinut periusissatut taallugu suliniutaanut ilaagaluartoq, taannalu Danmarkimi kalaallinik inooqataaniarnikkut ikiortarialinnik ikiuinissamik siunertaqaraluartoq, siunnersuineq suli annerusoq pisariaqartinneqarpoq, Søren Stach Nielsen isumaqarpoq.
Ikiuinerlu taanna ilinniarsimasunit kalaallisut oqalussinnaallutillu kalaallit kulturiannik ilisimasalinnit tunniunneqartariaqarsoraa.
- Matumani pingaarnerit tassaapput kalaallisut oqaatsivut atorlugit atornerluisunik katsorsaanissaq aammalu tarnip pissusiinik ilisimasalimmik kalaallisut oqaloqateqarsinnaaneq. Danmarkimi pisortanut tamanna angujuminaapput, taakkunanimi sulisut kalaallisut oqalussinnaasut amerlanngillat.
AAMMA ATUARUK Danmarkimi ilinnialersut amerliartortuarsinnarput
Inunnilli attavigineqartarpunga suleqatigiinnissamut periarfissaqarnersoq apeqqutigineqartarluni, periarfissarlu tamanna atorluarusuppara.
Søren Stach Nielsen Aalborgimi Kalaallit Illuutaanni aggustip aallaqqaataani atorfinippoq, siornatigullu atorfilittatut ukiuni arlalinni sulisimalluni, ilaatigut Namminersorlutik Oqartussani.
