Kalaallit Illuata immikkoortortaqarfii ataatsimoortinneqalersut

Aalborgimi Kalaallit Illuutaata ingerlatai ataatsimoornerusariaqarput. Pisortaqatigiit taama isumaqarput, taamaammat immikkoortortaqarfiit tamakkerlugit Vestebro 79-imut katersorneqassasut aalajangiuppaat.

Ornittagaq "Tamassa" Aalborgip illoqarfiata qeqqani Aagademi ullumikkut inissisimasoq taamaalilluni aamma Vesterbro 79-imut nuunneqassaaq.

Immikkoortortaqarfiit ataatsimoortinnerisigut, assersuutigalugu nukiit atorluarnissaat ilinniartitaanermullu aamma isumaginninnermut immikkoortortaqarfik akimorlugu suleqatigiinnissaq ajornannginnerulersinneqassaaq.

- Illu tassaassaaq uummaarissoq, nutaaliorfiusoq sammisaqarfiusorlu, Per Hjelm Hansen, Aalborgimi Kalaallit Illuutaanni pisortap tullersortaa isumaginninnikkullu siunnersortaasoq KNR-imut taama oqarpoq.

AAMMA ATUARUK Kalaallit Illuutaat Aalborgimiittoq illoqarfiup qiterpasissuanut nuulersoq

Kalaallit Illuutaat Aalborg Østimi Umanakvejimi ukiuni 37-ni inissisimareerluni Aalborgip illoqaffiata qeqqanut 2016-imi maajip aallaqqaataani nuunneqarpoq. Illoqarfimmi ersarinnerulernissamik kissaateqarneq tikeraanullu pisortat angallassissutaannik Aalborgiliartunut illup orninnissaata ajornannginnerulersinnissaa tamatumunnga pissutaavoq.

Kalaallit Illuutaannilli atuisunik apersuinermi paasinarsivoq illu ersarinnerulersimagaluartoq nuunneqarneratigullu ingerlanneqartartut amerleriarsimanngitsut.

Taamaammat maanna attartortuusut suleqatigisallu, ilaatigut Aalborgip Universitetia aamma Nunatta Angalatitsivia ininik 2018-imi juunip aallaqqaataanit attartorunnaassapput.

Kalaallit Illuutaata illumi init tamaasa taamaalilluni atorsinnaalissavai, isertarfiatalu nalaani caféqalissaaq, isiginnaatitsiveqalerluni pisiniarfeqalerlunilu.

- Periarfissaq atorsinnaasimanngisarput taamaalilluta 2018-ip ingerlanerani atorluartussanngorparput, Per Hjelm Hansen taama oqarpoq.

AAMMA ATUARUK Aalborgip Uumasuusivissua Nunarput pillugu immikkut sammisaqarfiussasoq