Kalaallinut ikiortariaqartunut aningaasaliisoqarnera nuannaarutigineqartoq
Kalaallit Danmarkimiittut isumaginninnikkut ikiorserneqarnissamik pisariaqartitsisut tapersersorneqarnissaannut Folketingimi amerlanerussuteqartut aalajangerpaat, ukiuni pingasuni tulliuttuni 46 millionit koruuninik aningaasaliisoqassasoq, tamannalu Kalaallit Illuutaanni Københavnimi pisortap Leise Johnsenip nuannaarutigaa.
Allattoq Jonas Fievé
- Tamanna nuannaarutigaarput, immikkummi sullissinitsinni kivitsinissamut nersualaarinninnertut taasariaqarpoq, Leise Johnsen oqarpoq.
Nunatsinni meeqqanut inuusuttunullu suliniutigineqartunut 10 millionit koruunit atorneqassapput. Danmarkimilu suliniutinut nutaanut 18 millionit koruunit atorneqassallutik.
Kommunip iluani sulisut namminerluni kajumissutsiminnik suliniuteqartut kalaallit ikiortariallit ikiorsertussanngussavaat, tamannalu suliniut tapersernarpoq pissanganarlunilu, Kalaallit Illuutaanni Københavnimi pisortaq Leise Johnsen DR-mut oqarpoq.