Kalaallit filmeraliaat Islandimi filmfestivaleqartitsinermi peqataassasoq
Filmiliami ilitsersuisup Aka Hansenip filmiliaa STG, nipilersoqatigiit Small Time Giants pillugit filmiliaq, Reykjavikimi filmfestivalertitsisoqarnerani takutinneqassaaq.
Small Time Giantsikkut Europami tusarnaartitseqattaarnerat, nipilersoqatigiillu nuusiaata "Stethoscope"-p pilersinneqarnera STG-mi malittarineqarput.
- Pissanganaqaaq maaniilluni. Filmiliamik naatsuliamik unammisitsinermi peqataasumik siullerpaamik takutitsivunga, taamaammat maanna pissanganarnerulaarpoq, Aka Hansen, Reykjavikimit oqarpoq.
AAMMA ATUARUK Small Time Giants pillugit piviusulersaarut Danmarkimi takuteqqaarneqassaaq
Aka Hansen filmilianik marlunnik RIFF-imik taallugu Reykjavikimi filmfestivalertoqarnerani peqataasareerpoq, filmiliat "Grøn Land" aamma "Half&half" tassani peqataatinnikuummagit.
Filmiliat katillugit qulit ukioq manna peqataatinneqarput, piukkunnarnerpaatullu toqqarneqartoq Golden Eggimik taallugu nersornaaserneqassalluni.
Filmi naatsuliaq STG, 2016-imeersuuvoq, Namminersorlutillu Oqartussanit, Nunanilu Avannarlerni piorsarsimassutsikkut attaveqaammit, NAPA-mit, aningaasalersorneqarsimalluni.
