Kalaallit festivalertitsinerat soqutigineqarluartoq
KØBENHAVN: Filmertarfiit ulikkaaqqasut, oqallitsitsinerit ulikkaaqqasut Danmarkimilu nuna tamakkerlugu aviisini arlalinni allaaserineqarnerit.
Kalaallit filimiliaannik festivalertitsineq, Greenland Eyes, Københavnimi sisamanngormat ammarneqarmalli soqutigineqarluarpoq. Kalaallit filmiliaat amerlasuut takutinneqarnissaannut isiginnaariat imaaginnavissimapput - naak tamanna arlalinnit ilimagineqarsimanngikkaluartoq, festivalip pisortaa filmiliortartorlu, Ivalo Frank, KNR-imut taama oqarpoq.
- Kalaallit Nunaanni eqqumiitsuliornerup filmiliornerullu Danmarkimi soqutigineqarnissaa amerlasuut qularisimagaluarpaat, festivaleritsinerulli uppernarsarpaa soqutiginninneq annertusoq.
Politikkimut tunngasunik sammisaqarneq
Tamanna Det Danske Filminstituttimut, Københavnimi festivalertitsinermi aaqqissuseqataasut ilaannut, isiginnaariartut amerlassussaasa takutippaat. Greenland Eyesip aaqqissuussinera instituttimut isiginnaariarneqartut ukiormanna annersaasa ilagaat. Tamatumunngalu pissutaasut marluusinnaasut Ivalo Frankip oqaatigaa:
Siullertut, festivali filminuinnaq tunngatinneqanngilaq aammali assilisanut, atuakkanut eqqumiitsulianullu allanut tunngasuulluni. Aappaattullu, festivalimi politikkimut tunngasut arlariit sammineqarput, ilaatigut Danmarkip nunasiaateqarsimanera maannalu saammasseqatigiinnissamik oqallinneq. Tamakkulu soqutigineqarluarput.
- Inuiaqatigiinni assigiinngitsorpassuit pisarnermit amerlanerusut aaqqissuussinernut aggiapput. Politikerit, atuakkiortut, tusaamasat inuillu nalinginnaasut, tamannalu assut nuannerpoq, Ivalo Frank oqarpoq.
Festivali unnugu naggaserneqassaaq, 180-inik isiginnaartoqarluni filmi "Sumé - Mumisitsinerup Nipaa" Københavnimi Cinematekimi takutinneqassalluni. Festivali ukiaru angallanneqaqqittussaavoq, Savalimmiut, Island, Sverige Norgelu tikinneqassallutik.
