Kalaallit eqqumiitsuliortut AROS-imi takutitsilersut
Aarhusip eqqumiitsulianik katersugaasiviata AROS-ip assilissanik eqqumiitsuliortumut, Naja Rosing-Asvidimut sulliveqartitsilaarniarneranut atatillugu kalaallit eqqumiitsuliaat katersugaasivimmi ukkatarineqassapput.
Aarhusimi kalaallit illuat tusagassiutinut taama allappoq.
Naja Rosing-Asvid illussanik titartaasartutut ilinniarsimasuuvoq assilissanillu eqqumiitsuliamik nunani arlalinni takutitsisimavoq. Naja AROS-ip tamanit iserfigineqarsinnaasumi sulliveqarfiani, AROS Public Atelieriani maajip aappaaniit 28-anut sulissaaq, tassungalu takornariat sulineranik isiginnaarsinnaassapput suliaanullu tunngasunik tusagaqarsinnaassallutik.
Kalaalerpassuit takutitsissasut
Naja Rosing-Asvidili kalaallinit eqqumiitsuliortunit kisimi danskinut takutitsisuunavianngilaq.
Eqqumiitsulianik katersugaasivik maajip 20-ani 21-anilu mini-festivalimik aaqqissuussissaaq taannalu ”Nye fortæller fra Grønland – Den Grønlandske Revolution”-imik taaguuteqassalluni, tassa Kalaallit Nunaannit oqaluttuat nutaat – Kalaallit mumisitsinerat”. Kalaallillu arfineq marluk eqqumiitsuliatik oqaluttuaralugillu oqallisigissavaat.
Aarhusimi kalaallit illuanit eqeersaanermik ingerlatsisut NUKIGA, katersugaasivik AROS eqqumiitsuliortullu suleqatigiinneratigut taamanna aaqqissuunneqarpoq.
- Uagut isiginninnitsinni Kalaallit Nunaannit oqaluttuat nutaat sammineqarnissaat pingaaruteqarpoq, kalaallimmi eqqumiitsuliortut matumani oqallinnermi maluginiarneqarpallaaratillu oqaaseqariarfissaqarpallaanngillat, AROS Publicimi pilersaarusiortoq, Maj Bjørn Ørskov oqarpoq.
Naja Rosing-Asvidip saniatigut filmiliortoq Ivalo Frank, atuakkiortoq Nauja Lynge, assilissanik eqqumiitsuliortoq Gukki Nuka, assilissanik eqqumiitsuliortoq Boletta Sils-Høegh, nipilersortartoq Kristian Mikkelsen, nipilersortartoq Miki Jensen, filmiortartorlu Otto Rosing aamma peqataassapput.
