Kalaallit eqqumiitsuliaat nuannarineqaqisut
Københavnimi Bella Centretimi sapaatip-akunnerata massuma naanerani saqqummersitsisoqarpoq, nunallu Skandinaviameersut saqqummersitsisarneranni annerpaalluni.
Peqataanissarlu imminut akilersinnaagunarpoq.
Art Copenhagenimimmi taallugu saqqummersitsineq suliluunniit ammarneqanngitsoq kalaallit eqqumiitsuliaat 66-iusut akornanni sisamat tunineqareersimapput. Kalaallit Københavnimi Illuutaat tusagassiuutinut nalunaarummi taama ilaatigut allaaserisaqarpoq.
Eqqumiitsuliortut saqqummersitseqataasut tassaapput:
Naja Rosing-Asvid, Lisbeth Karline Poulsen, Ivan Burkal, Ivínguak Stork Høegh, Julia Pars, Buuti Pedersen, Sissi Møller, Kristine Spore Kreutzmanna, Gukki Nuka kiisalu Lars Møller.
Qalipakkat, eqqumiitsuliat digitalinngortitat, assit katitikkat, marraat, eqqumiitsuliat igalaaminermeersut, eqqumiitsuliallu qissianeersut nunatsinneersullu assigiingitsut Art Copehagenimi ilaatigut saqqummersinneqarput.
Kalaallit eqqumiitsuliaminnik saqqummersitsiviat Kalaallit Københavnimi Illuutaannit aaqqissorneqarsimavoq, kunngissakkullu aningaasaateqarfiannit Kronprins Frederiks og kronprinsesse Marys Fondimit NAPA-miillu aningaasalersorneqarluni.
