Kalaallit dommerit marluk Tjekkiamukalersut
Kalaallit futsalimik nunanut allanut unammisartui Generali Futsal Cupimut, Tjekkiami marsimi pisussami, unammigialerpata kalaallit dommerit marluk ilaassapput.
Michael Jensen, dommeri misilittagartooq aamma Jens Kleist Østergaard, dommeritut ilinniaqqammersoq, Tjekkiamut misilittakkanik ilisimasanillu katersiartortinneqassasut, GBU KNR-imut ilisimatitsivoq.
GBU-p dommerinik Tjekkialiartitsiniarnera UEFA-mut, europami arsaattartut kattuffiannut, aamma FIFA-mut, nunarsuarmi arsaattartut kattuffiannut ilaasortanngornissamik qinnuteqarnissamut attuumassuteqarpoq.
- Nunatsinni dommerit qaffasissumi dommeriusinnaasariaqarput. Taamaammat dommerigut qaffasinnerusuni misilittagaqarnissaat pingaaruteqarluinnarpoq, Niké Berthelsen, GBU-mi generalsekretæri, KNR-imut oqarpoq.
Dommeritsialak
Michael Jensen GBU-mi dommerinik ilitsersuisartuullunilu ineriartortitsisartuuvoq, taamaammat aallartitassatut toqqarneqarnera pissusissamisoorpoq. Jens Kleist Østergaard, 27-inik ukiulik Nunatsinni arsaattartutut pissartaasarnikoq ukiorlu ataaseq sinnerlugu dommeriusartoq DBU-milu dommeritut allagartalik, aamma piukkunnartuusoq GBU nassuiaavoq.
- Jens nammineq kajumissutsiminik Danmarkimi dommeritut ilinniarnikuuvoq. Dommeriuvoq inuusuttoq piginnaanilik, Niké Berthelsen oqarpoq.
Kalaallinik Nordic Cupimi (futsal) Island Gamesimilu (silami arsaanneq) dommereqartalernissaa anguniagaavoq.
Dommerit aallartussat Nunatta nunanut allanut unammisatui sungiusaasuilu marluk angalaqatigissavaat. Unammigiartussat suli toqqarneqanngillat.
AAMMA ATUARUK Futsalimik nunanut allanut unammisartut piareersartut