Kalaallit danskillu killeqarfiit pillugit piumasaqaatitik Canada pissutigalugu annertusarpaat
Canadap Nunattalu imartaasa killeqarfiisa allanngortinneqarnissaannik Canada piumasaqaateqarnissaminik nalunaaruteqareersorlu, Nunarput Danmarkilu suleqatigiinnerunissamik isumaqatigiipput. Taamalu suleqatigiinneq, Naalagaaffiit Peqatigiinnut piumasaqaateqarnissamut sunniuteqassasoq, Naalakkersuisut siulittaasuata, Aleqa Hammondip oqaatigaa.
- Canadap imartamik annertunermik piumasaqareersorlu uagut piumasaqaatigut qimerlooqqittariaqalerpavut, tassalu taakku Naalagaaffiit Peqatigiinnut saqqummiutissallutigit, Aleqa Hammond oqarpoq.
AAMMA ATUARUK Canada Ruslandilu aaqqiagiinnginnerat Tartupalulerngusaannermut pitsaavoq
Canadap Nunattalu akornanni imartaq assigiimmik annertussuseqartussatut, Canada 2013-imi isumaqatigiinniarfineqarmat tamanna iluatsikkaluarpoq. Immalli naqqanik misissuineq suli naammassineqanngimmat isumaqatigiissutaasoq taamaatiinnartariaqartoq, Canada siorna decembarimi nalunaarpoq. Tassalu misissuineq maanna naammassisimalermat Canada imartap killeqarfianik annertunerusumik piumasaqaateqarpoq.
Tamannalu Nunatta aalisarnikkut aningaasarsiorsinnaaneranut sunniuteqarnerluttussaassasoq, Naalakkersuisut siulittaasuata oqaatigaa.
- Suliaq tamanna pingaaruteqartupilussuuvoq Naalagaaffeqatigiinnillu eqqummaariffigineqarluartussaassalluni. Qalasersuarmut tunngatillugu aamma Issitumi sumiiffiit assigiinngitsut pillugit isumaqatigiinniarnerit Nunatta siunissaanut pingaaruteqarluartuupput, Aleqa Hammond aviisimut Informationimut oqarpoq.
