Aaja Chemnitz Larsen: Kalaallit Danmarkimiittut atugarissaarnerussapput
Nalunaarusiami meeqqat ilaasa Danmarkimi qanoq pineqartarnertik pillugu oqaluttuaat nuannerpallaanngitsunik ilaqarput.
- Atera pillugu qinngasaarneqartarpunga. Aamma aalakoornerartarpaannga, kisianni soorunami meeraagama aalakoorneq ajorpunga. Kalaallit Nunaanneersuunera pissutigalugu taama oqartarput, Børnerådip misissuinerani meeqqat apersorneqartut ilaat Paninnguaq oqaluttuarpoq.
Oqaluttuallu ilaat siunissami suliassanut tikkuussisinnaasut Inuit Ataqatigiit Folketingimi ilaasortaatitaat isumaqarpoq.
- Kalaallit Danmarkimi najugallit ajornartorsiuteqartut eqqarsaatigigaanni, isumaqarpunga meeqqat oqaluttuarnerisa ersarissumik takutikkaatigut siunissami sunik unammilligassaqarnersugut, Aaja Chemnitz Larsen taama oqarpoq.
AAMMA ATUARUK Kalaallit Danmarkimiittut meerartaat qinngasaarneqartarneri iliuuseqarfigineqarli
Kalaallit atugassarissaarnerussapput
Aaja Chemintz Larsenip erseqqissaatigaa kalaallit meerartaat Danmarkimi najugallit ingerlalluartorpassuummata.
Taamaattumillu ingerlalluartut amerlanerulersinniarlugit periarfissaannik amerlanerulersitsinissaq pingaatinneqarpoq.
- Kalaallit Danmarkimiittut aamma kalaallit meerartat ajunnginnerusumik atugaqalernissaat anguniarlugu periarfissaannik tunniussisinnaanerput pingaaruteqartoq erseqqissartariaqarpara, Aaja Chemnitz Larsen oqarpoq.
Iliuuserineqartut ilagaat aningaasat 36 millionit koruniit immikkoortinneqarsimammata, taakkulu kalaallit Danmarkimi najugallit pillugit inunnik isumaginninnermut tunngasut nukittorsarneqarnissaannut atorneqassallutik.
- Aningaasat kommunenut maanna tunniussuunneqalerput, kommunenullu amerlanernut agguaanneqarmata nuannaarutigeqaara. Aningaasat Danmarkimi illoqarfiit anginerni tallimaannaarni atorneqannginnissaat sulissutiginikuuarput, kalaallimi Danmarkimi tamani siaruarsimapput, Aaja Chemnitz Larsen taama oqarpoq.
Folketingimut ilaasortaq Aleqa Hammond nalunaarusiaq pillugu oqaaseqartinniaraluaratsigu iluatsinngilarput.
