Kalaallit Danmarkimi efterskolertut aallartinnerluttorpassuusartut
Atuarnerup aallartinneranit sapaatip akunneri marluk ingerlariilaatsiaannartut ilinniarnermut siunnersortit kalaallinut arfineq-marlunnut efterskolertunut ajornartorsiortunut ikiuisariaqarsimapput. Atuartut ajornartorsiuteqangaatsiartut nalunaarutigineqareersoq tamanna pivoq.
- Ukioq manna ajornartorsiuterpassuusut takusinnaavarput. Tamanna uggornaqaaq tassami atuarnerup aallartinneranit aatsaat ullut qulit qaangiupput, ilinniartunut siunnersorti, Pia Rosing Heilmann KNR-imut oqarpoq.
Danskisut piginnaasakitsut nassataqaratillu
Kalaallit Illuutaata kalaallit atuartut 34-t Sjællandimi augustip qaammataani efterskolerlutik aallartittut attaveqarfigaat. Marluk atuarunnaareerlutik Kalaallit Nunaannut uteriartorput arfinillillu oqaatsitigut ilaatigut ajornartorsiuteqangaatsiarput.
Oqaatsitigut ajornartorsiut ima annertutigaaq allaat atuartitsinermi atuarfimmilu ataatsimut sammisassani peqataasinnaanatik.
AAMMA ATUARUK Attaveqaqatigiit Danmarkimi efterskolertunik tapersersuissasut
- Amerlasuut ittoorpallaarnerat ajornartorsiutit annerpaartaraat danskisullu piginnaasaat efterskolernissaannut naleqquttarani. (Danskisummi, aaqq.) oqarsinnaasariaqarput. Ilikkagaqarnissamullu oqaatsit nalunnginnissaat pisariaqarluni, Pia Rosing Heilmann oqarpoq.
Kalaallit danskit efterskoliini atuartut + atuarnerminnillu unitsitsisut
2015/16: 265 aallartipput - 51 unitsitsipput
2014/15: 282 aallartipput - 56 unitsitsipput
2013/14: 307 aallartipput - 54 unitsitsipput
2012/12: 282 aallartipput - 25 unitsitsipput
2011/12: 259 aallartipput - 24 unitsitsipput
2010/11: 283 aallartipput - 30 unitsitsipput
Nunatsinni efterskoleni (Efterskole Villads Villadsen Maniitsumilu Efterskoli) aallartittut unitsitsisullu:
2015/16: 160 aallartipput – 56 unitsitsipput
2014/15: 167 aallartipput – 51 unitsitsipput
2013/14: 160 aallartipput – 68 unitsitsipput
2012/13: 157 aallartipput – 52 unitsitsipput
2011/12: 157 aallartipput – 43 unitsitsipput
Namminersorlutik Oqartussat Danmarkimi efterskolertussanut tapiissuteqartarput. Tapiissuteqarnissamut angajoqqaat isertitaat aallaaviusarput. Isertitat ukiumut 340.000 koruunit ataappatigit efterskolernermi aningaasartuutit tamarmik akilerneqarsinnaapput.
Tigusiffik: Naatsorsueqqissaartarfik aamma Sullissivik.gl
Aalborgimi, Aarhusimi Odensemilu Kalaallit Illui efterskolertunik attavigisaminnik sapaatip akunnerani ataatsimi marlunniluuniit aatsaat atuareersimalertuni ajornartorsiuteqarnermik aamma nalunaaruteqarput.
Kalaallit Illuutaasa efterskolillu danskisut piginnaasakitsut saniatigut atuartut efterskolernerminni pisariaqartitatik soorlu qarasaasiat angallattakkat timersuutillu piginagit tikittartut naammattoortarpaat. Ataasiakkaat nassataqavinnatik tikittarput.
- Ilaat atisanik taartissaqanngitsut kigutigissaatissaqanngitsut kigutinulluunniit qaqorsaatissaqanngitsut aningaasaateqanngitsulluunniit naammattoornikuuagut. Aningaasanik ukiumut ataatsimut naammattunik nassataqartariaqarneranngilakka. Ilaalli 20 koruuniinnannguamik tigummiaqarlutik tikittut naammattoornikuuarput, Pia Rosing Heilmann oqarpoq, ilaallu mittarfimminngaanniit atuarfinnut akissaqarnerluunniit ajortut oqaatigalugu.
Piareersimannginneruleriartuinnartut
Kalaallit 200-ut 300-ullu akornanniittut danskit efterskoliini ukiut tamaasa aallartittarput. Tamannalu neqeroorutitsialaavoq, tassami atuartut atuakkerinikkut inooqatigiinnermullu amerlanertigut pikkorinnerulertarput, Kalaallit Illuinit taama oqariartuuteqarput.
Ukiumi efterskolerfiusussamut kalaallit atuariartartut piareersimannginneruleriartuinnarput. Taamaammat arlallit ajorsarnerannik tamanna kinguneqartarpoq, Odensemi kalaallit illuanni ilinniarnermut siunnersorti, Mette Lund oqarpoq.
AAMMA ATUARUK Pitsanngoriaateqarnissamut periarfissaqarpoq
- Danskisut pikkorinnerulernerat maluginngilarput – killormuanilli. Tamannalu unittoornerannik kinguneqartarpoq, Mette Lund oqarpoq.
Kalaallillu atuariartut arlallit qarasaasiamik angallattagaqarnatit, oqarasuaammik angallattagaqarnatit efterskolenili amerlanerni piumasaqaataasunik nassartannginnerat tamatumani ajornannginnerulersitsinngilaq.
- Allanit avissaaqqalerneranik kinguneqartarpoq taamatullu danskit efterskoliini sammisassani peqataaniarnerat ajornartorujussuanngortarluni, Mette Lund oqarpoq.
