Kalaallit Danmarkimi: Arnat marluk piukkunnarluinnartut
- Isumaqarpunga qinersinerup inernera pissanganarluinnartoq arnat piukkunnartut marluk nunarput sinnerlugu Folketingimi ilaasortanngormata, Bitha Metelmann oqarpoq.
Taamaattorli naalakkersuisut nikinnerat oqaaseqarfigerusunngilaa, Kattuffik Inuit naalakkersuinermut attuumassuteqanngimmat. Kisiani kalaallit Folketingemut qinigaatitaat nutaat marluusut isumalluarfigineqarput.
- Neriuppunga kalaallit maani najugaqartut pillugit qineqqusaarutitik timitalerumaaraat, oqarpoq.
Taamatut oqarnermini eqqarsaatigaa kalaallit peqatigiiffiisa kattuffiat Inuit kissaateqarmat kalaallit Danmarkimi innuttaasunut allanut sanilliullugit naligiissumik isigineqalissasut, Bitha Metelmann erseqqissaavoq.
- Pissanganartuaannarpoq kiinnat nutaat takkukkaangata periarfissat nutaat taamaasillutik ammaanneqartarmata. Tamanna tassa pissanganaqutaavoq - siuliisami suliaat maanna ilisimalereerpagut. Maanna nutaat marluk iserput neriuutigaarpullu suliat nutaat aallartikkumaaraat siulerisaminnillu saqqumilaarnerullutik, oqarpoq.
Suliniaqatigiiffik Inuit tassaavoq Danmarkimi kalaallit peqatigiiffiisa kattuffiat.