Kalaallit biilernermut ilinniutaat qanganisarujussuullunilu paasiuminaatsoq

Kinaluunniit kørekoritaartussaq angallannermut malittarisassanik assigisaannillu aalajangersaasumik biilinik ingerlatsisinnaanermut ilinniummik atuagaqartussaavoq.

Kalaallit Nunaannili biilinik ingerlatsisinnaanermut ilinniut 1994-imeersuuvoq taamanili nutarterneqarsimanngilaq niuertarfinnilu nalinginnaasumik pisiassaanani.

Taamaammat Inuit Ataqatigiit folketingimut ilaasortaatitaata, Aaja Chemnitz Larsenip tamatumani nunatsinni Danmarkimilu akisussaasoq, angallannermut ministeri, Ole Birk Olesen apeqquteqarfigaa. Tamanna ilutigalugu ministerip biilinik ingerlatsisinnaanermut ilinniut 1994-imeersoq nutarsarlugu nutaamik suliaqartoqarnissaanut suliniuteqaqqullugu kaammattorpaa.

AAMMA ATUARUK Biilit ukiuni 18-ini misissorneqarsimanngitsut

Biilinummi tunngasunik assigiinngitsorpassuarnik ukiuni taakkunani allannguuteqartoqarnikuuvoq.

1994-immi kingornatigut assersuutigalugu qitequtaasat isumannaallisaatit atornissaat inassutaalerput, oqarasuaatit angallattakkat biilimik ingerlatsitilluni tigummiaannarnissaat inerteqqutaalernikuuvoq, Aaja Chemnitz Larsen Ole Birk Olesenimut allappoq.

Angallannermullu ministerip iliuuseqartoqartariaqarnera isumaqatigaa.

- Biilinik ingerlatsisinnaanermut ilinniutip nutarterneqarsimannginnera naleqqutinngitsoq isumaqaavunga, Ole Birk Olesen allappoq, apeqqullu Politiinut Angallannermullu naalakkersuisoqarfimmut tulliani ataatsimiinnissaminni qaqinniarlugu neriorsuivoq.

KNR-ip atuagaarniarfik Atuagkat Nuummiittoq attavigaa, biilinullu ingerlatsisinnaanermut ilinniut ukiuni arlalinni tunisinnaasimanagu paasissutissiissutigaat. Biilinillu ingerlatsisinnaanermut atuakkamik nutaamik nutartikkamik peqalernissaa qilanaaraat.