Kalaallit arsaannermi unammillersinnaasut

Kalaallit Futsalimi nunanut allanut unammisartut Nordic Cup-eqareernerani killiffitsik takusinnaallualerpaat, qasujaassutsikkullu naammaginartumik inissisimasut nunanut allanut unammisartunut sungiusaasoq Rene Olsen isumaqarpoq.

- Unammisartugut amerlanerit ullut tamarluinnangajaasa sungiusartarput tamannalu unamminerni takuneqarsinnaavoq, timerput atorlugu akeqqagut unammillerluarsinnaallugit takusinnaalerparput qasujaassutsikkullu naammaginartumik inissisimalluta, Rene Olsen KNR-imut oqarpoq.

Sakkortunerusariaqartut

Kalaallit qasujaassutsikkut nukittussutsikkullu unammillersinnaagaluartut sanngiiffiat arsariaatsimiittoq sungiusaasup nassuerutigaa.  

- Unammisatta arsariaasiat sakkortuupilussuuvoq. Taakku naligilissagutsigit arsariaaserput sakkortunerusariaqarpoq, Rene Olsen oqarpoq.

Kalaallit nunat allat unammisaat iligiittut misilittagaqarnerupput, ilaat ukiorpassuarni iligiittut arsaqatigiittartuupput nunallu amerlasuut unamminikuullugit.

Kalaallit unammisartuini misilittagartunerpaat aatsaat qulit angullugit nunanut allanut unammeqataapput. Taamaammat kalaallit misilittagakinnerat ersarittoq sungiusaasup aamma oqaatigaa.

Imminnut pisarisut

Kalaallit futsalimi unamminerminni sisamaasuni pingasoriarlutik ajorsarput ataasiarlutillu ajugaallutik. Norgemut ajugaanerup kingorna ajugaaqqinnissaq arsartunut qanoq pingaartigisoq Renep takusinnaasimavaa.

Qallunaanut unamminnginnermi arsartut imminnut upperinerulersimasut sungiusaasup oqaatigaa. Ajugaarusuppallaarlutilli imminnut pisarisimapput. 

- Arsartut qallunaanut ajugaanissartik pingaartittupilussuuaat. Malunnartumik pissangapput kingunerisaanillu iligiittut arsarniarnerat iluatsinngitsoorluni. 

- Målitta saavani kukkuluttornerit akisunaarpagut, pisariaqanngitsunimmi isertitsiffigineqaqattaaleratta, Rene Olsen oqaluttuarpoq. 

Qullilisut

Kalaallit unammisartui qallunaanut ajugaarusussimagaluaqisut ajorsaramik pakatseqaat.

- Unammineq naammassimmat arsartugut pakatsisimaqisut ilaallu qullilisut takusinnaavakka. Tamannalu uannut sungiusaasutut uummatikkut attortisimanarpoq. Qallunaanummi ajugaanissarput pingaartikkaluaqigatsigu, Rene Olsen oqarpoq.

Kalaallit arsariaatsimikkut siuariartussagunik nunanut allanut unammisarnerit amerlanerusariaqartut, sungiusaasup oqaatigaa.
 

AAMMA ATUARUK Grønland fik 3 point i Nordic Cup