Kalaallit arnat ullumi Puerto Ricormiunut ajorsalaarput
Kalaallit arnat assammik arsartartut amerikap nunavittaani assammik arsarluni unammersuarnermi Cubap illoqarfiani Havanami ingerlanneqartumi Puerto Ricomut ajorsarput. Taamalillutik kalaallit gruppi A-mi nr.4-tut inissipput, inissiffigisinnaasarlu pitsaanerpaaq angusinnaasaat taamaallaat nr.7-lerpoq. Taamatut inissinnerat isumaqarluni nunarsuaq tamakkerlugu arnat ajugaaniutivinnissaannut Danmarkimi decembarimi pisussami peqataanissamut periarfissaarunnerat.
Puerto Ricomut unamminerup affaa ingerlareersoq kalaallit 13-11-mik siuaqqagaluarput. Ullumikkullu unammineq 26-27-mik inerneqarpoq.
- Ullumi ajorsarpugut, unamminermi minutsit 40-ut siulliit siuaqqaannaavissimagaluarpugut målinillu sisamanik siuqqasimagaluarluta ajorsarpugut, Kalaallit arnat arsartartuinut sungiusaasoq Jakob Andreassen SMS-ikkut Cubamiit taama nalunaaruteqarpoq.
Aamma atuaruk Kalaallit nunarsuarmi pissartanut ajorsarput
40 minutsit ingerlareersullu periarfissarujussuit sisamat tallimalluunniit isertinngitsoorpaat, anisitaasoqarlunilu.
- Unamminerup naammassinissaanut minutsit quliinnanngortut naligiippugut, taamaakkaluartoq iluatsitseqqinngilagut, allaat naggataani arsartut siuaraluartut saassussinermilu målmandi peqataagaluartoq, nunanut allanut unammisartunut sungiusaasoq ugguarpaloqisoq taama allappoq.
Kalaallit gruppiminni nr. 4-tut inissipput, tassani Venezuelamiunut naligiipput, USA-mullu ajugaallutik unamminerillu pingasut ajorsarfigalugit.
Aqagu marlunngornermi kalaallinut qasuersarfiussaaq ullullu marluk qaangiuppata kalaallit arnat assammik arsartartut gruppep aappaani nr.3-tut inissinnikut naapissavaat. Unamminerit kingulliit suli ingerlanneqanngimmata kikkut naapissaneraat suli inissinneqanngilaq, kisianni Argentina, Mexico Uruguayiluunniit inissinniuullutik unammisinnaavaat.
Inernerit inissinnerillu allattorsimaffiat uani takuuk.
Aamma atuaruk Kalaallit nunarsuarmi pissartanut ajorsarput